Konsehak Daisy Coffie di Frakshon Coffie a manda un karta ku pregunta pa Kolegio Ehekutivo di Boneiru ku e petishon pa e haña kontesta riba e preguntanan den reunion di Konseho Insular di djamars 3 di novèmber. Den su karta Daisy Coffie ta skirbi ku el a tuma nota di e e trato desigual ku gobièrnu hulandes ta praktiká relashoná ku dunamentu di gratifikashon na personal den kuido na Hulanda. E argumentunan ku ta usa na su konsepto no ta argumentunan obhetivo ku por hustifiká e trato desigual aki. Nos personal di kuido for di momento ku e pandemia a ataká Boneiru su komunidat tambe a traha bou di preshon i no na e ultimo lugá pa motibu di entre otro falta di kapasidat di kuido en general i spesialmente falta di kuido intensivo.
Nivel igual ku di Hulanda
No mas ku algun siman pasá riba insistensia di Kolegio Ehekutivo i en partikular diputado Nina Den Heyer, gobièrnu hulandes a bai di akuerdo pa rekonosé nos personal di kuido ku a sigui nos propio akademia FM Academy riba e mesun nivel ku nan koleganan den kuido na e parti oropeo di Hulanda. En general inspekshon a konstatá ku e nivel di kuido aki na Boneiru a subi te na e nivel di esun Ulandes. I tur esaki grásias na e dedikashon i esfuersonan i hasta sakrifisionan personal di esnan den kuido aki na Boneiru. No mester balotá e inseguridat pa nan salú ku ta eksistí na momentu ku tur dia di nobo e personal mester sali bai trabou koriendo e riesgo ku nan tambe por keda afektá. E preshon aki no ta unu di ser supestimá.
Rekonosementu pa trabou balioso
Pa tal rason Daisy Coffie ta kere ku ta mas ku hustu pa nos personal di kuido tambe risibí e gratifikashon aki komo muestra di rekonosementu di nan trabou balioso den e temporada di krísis aki, ku manera ta konosí ta leu di haña un solushon. Un rekonosementu asina su efekto motivante ta muchu mas grandi ku e efekto demotivante ku aktualmente korektamente e personal ta sinti ku e trato desigual ku nan ta risibí. No ta eksistí un diferensia esensial entre e funshon di un personal den kuido na Hulanda Oropeo i na Hulanda Karibense. Pues konsekuentemente no por, ni mag di eksistí un diferensia den e pago di un gratifikashon.
Pregunta
Den su karta konsehal Daisy Coffie a hasi e siguiente preguntanan na Kolegio Ehekutivo c.q. e diputado enkargá. Kolegio Ehekutivo a tuma nota di e pago di gratifikashon na personal di kuido na Hulanda relashoná ku nan dedikashon ekstraordinario den e temporada di krísis aki okashoná pa Covid-19? Si ta asina, Kolegio Ehekutivo a tuma nota ku e gratifikashon aki lo no konta pa nos profeshonalnan den kuido? Kolegio Ehekutivo ta di akuerdo ku e argumentu(nan) ku a usa pa krea e desigualdat aki? Si Kolegio Ehekutivo no ta di akuerdo ku e argumentunan, Kolegio Ehekutivo den un forma formal a informá gobièrnu hulandes di e posishon di Kolegio Ehekutivo i Kolegio Ehekutivo por pasa e informashon aki pa Konseho Insular? Kolegio Ehekutivo ta na altura di e posishon ku Fundashon Mariadal a tuma den esaki i igualmente e posishon ku e sindikato ku ta representá e gran mayoria di profeshonalnan den kuido a tuma? Si Hulanda mantené su posishon di trato desigual, Kolegio Ehekutivo tin instrumentonan na su disposishon pa atendé ku nos profeshonalnan den kuido pa den un òf otro forma finansieramente nan risibí un gratifikashon?
