Despues di 9’or di anochi a cuminsa un persecucion formal entre polis y un Kia Picanto blanco numera V-4404. Pa motibo cu e dicho auto tabata core inresponsabel .
E chauffeur di e Kia Picanto a ocasiona un accidente na di Pos Chiquito y a sigui bay direccion pariba na altura di Citgo Savaneta y a bolbe ocasiona un otro accidente y a sigui bay direcion San Nicolas. Na altura di retonde FTA patruya di San Nicolas a topa cu e dicho auto. E patruya a dune e chauffeur señal pa para pero ta keda nenga di cumpli cu esaki . A cuminsa un persecucion formal na unda e Kia Picanto a dal den diferente auto y despues dal frontal cu un autobus na altura di House of Cake Savaneta.
Na dado momento a logra para e auto pero e chauffeur femenino a cuminsa manda e auto dirigi riba polis. Polis lo mester a usa su arma reglamentario y a los tiro, pero asina mes e chauffeur femenino a sigui core e auto. Polis cu refuerso a logra para e dicho auto aki pero aki ta unda cu e chauffeur femenino cu tabata bou influencia di un of otro substancia a resisti formalmente cu e agente policial siendo cu e ta herida. Agentenan a domina e situacion y ta logra deteni e persona femenino aki.
Mirando e situacion serio aki e departamentonan concerni di KPA entre otro Polis di trafico y Polis technico a yega na e sitio pa asina cuminsa cu e investigacion. Landsrecherche y Slachtofferhulp tambe a wordo poni na altura.
E situacion di e chauffeur femenino ta stabiel y a wordo hiba hospital pa mas tratamento medico avansa.
