Nos cu tin nos fe den Cristo no por keda sconde nos luz. Pa e luz sigui briya, ta importante pa nos dobla nos rudiya y pidi Dios Omnipotente pa guia nos pa nos cana den e luz di fe y berdad. E luz di fe pa nos Cristian ta manera un auto cu ta corre den anochi scur sin cu su luz ta briya. Elo por wordo enbolbi den un accidente of hasta causa un accidente. Si nos luz ta flauw anto ta tempo pa nos charge nos bateria pa di e forma ey nos keda mira cu nos wowonan spiritual pa nos por distingui mihor kico bon di e malo. P’esey ta imperativo pa no apoya partidonan politico cu ta bay aproba leynan cu ta bay contra leynan di Dios. AVP su ideologia ta Cristian democrata, pero awe e ta un partido cu no ta para pa su ideologia Cristian. Ela hala for di principionan di Dios y awe nos por mira cu locual cu ela sembra e ta cosecha. Dios su palabra ta real. E partidonan cu a bay contra leynan di Dios nan dia tambe lo yega.
Nos tin un gobierno cu den 6 aña di tempo a aumenta nos debe nacional cu 1.8 biyon florin. Nos por mira rond y no lo encontra ningun projecto nobo. Nos carreteranan ta manera crater riba luna. Nos edificionnan di gobierno y scolnan no ta wordo manteni. Mayornan ta man na cabez paso a aumenta e schoolgeld tambe. Nos grandinan y esnan sin trabao no por paga nan eigenbijdrage di AZV pa haya nan remedi y gobierno no ta interesa den nos grandinan y esnan sin trabao. Gobierno no ta interesa den salud di nos pueblo y ta prefara laga nan muri. Bida di hende no tin balor na man di e gobierno aki.
E minister di raiz a sali manera un leon pa ELMAR NV baha prijs di electricidad. Parse cu su gasolin a caba na caminda. E grito di e minister ta manera un grito den desierto y tur cos ta keto. E minister a lubida cu WEB NV ta hinca den debe pa via di no a hedge y ta retira directornan y e middle man ta fia placa pa WEB NV. Segun informacion e minister di raiz a firma un acuerdo cu Ecotec y a lubida riba Serlimar. April ta yegando su fin y otro luna e parkeermeters lo drenta back den servicio. Laga nos mira esnan cu ora nan tabata den oposicion a primiti di no lo paga parkeermeters y ora nan ta den gobierno parkeermeter lo pasa pa olvido. Cos ta asina caro cu pueblo ta cana cu saco bashi pa no bisa cu saco kibra mientras pa ministernan tin placa pa auto nobo, biaha den first class y fiesta. E lema di World Economic Forum ta birando realidad paso pueblo lo no tin nada y pueblo lo ta feliz.
Nos tin un gobierno cu ta refinancia nos debenan nacional y nos debe ta sigui subi. Segun informacion cu gobierno a hasi uso di nos companianan estatal y edificionan di gobierno pa sigui crea mas debe. Gobierno a hypoteca nos Aruba completo. Mayan cu gobierno no por cumpli pa paga e debenan cu nan a crea lo cuminsa pone embargo riba nos companianan estatal y bende propiedad di pueblo esta edificionan y companianan estatal nan findishi.
Nos ta den un guerra entre luz y scuridad. Si nos ta cana den luz nos lo mira e situacion manera Dios ta mire. Nos lo mester scohe entre e bon y hala for di e malo. E malo nunca lo por trese bon pa nos. E metanan di desaroyo sostenibel ta un agenda diabolico. Tur caminda cu ta pusha e plan aki e pais ta bay malo y Aruba su situacion no ta leuw di dje. Nos a biba hopi tempo bon aki na Aruba y mas nos a hala for di Dios mas pio nos situacion a bira. Nos ta den e tormenta perfecto y lo nos sinti su efectonan. E pueblo Cristian no tin representante den Parlamento. E huicio di Dios t’ey caba. Unico partido cu tin e famia y norma y balornan na pecho ta partido Curpa. Partido Curpa ta e unico alternativa.