Dilanti Ministerio di Husticia, e periodista Sharina Henriquez a expresa su preocupacion pa e situacion di prensa na Aruba.
Manera por corda, Sharina Henriquez a wordo deteni riba e prome dia di Toque De Queda ora cu el a subi caya pa haci su trabou como periodista. El a denuncia e acto aki na instancianan internacional pa motibo cu ta limita su trabou como periodista.
E periodista a expresa cu e ta compronde cu den e tempo di Pandemia gobierno ta bini cu hopi medida, pa protege comunidad. Sinembargo, e tin miedo cu esaki a bay mucho largo. “Si nos no watch out, esaki ta bira un normal nobo di berdad. Libertad di prensa ta e pilar di un democracia pa cual ta hopi importante pa no acepta actonan contra esaki y hacie bira normal.”
El a entrega un keho aña pasa pasobra el a sinti cu polisnan a detene ilegalmente. Te ainda Polis no a actua riba e keho y no a haya ni e cita cu el a pidi cu Altocomisario. P’esey riba 3 di mei, cu ta e fecha internacional di libertad di prensa, el a dicidi di bay publicamente riba e tema aki.
Asina el a splica cu e press index freedom cu Hulanda ta mantene, a baha Aruba cu un posicion, hustamente despues di denuncia di su detencion. Henriquez ta sinti cu e hecho aki a sosode mas cu un aña pasa y esnan concerni mester por a trata di resolve e problema, pero no a haci nada. Y esaki awo ta e consecuencia pa e evaluacion di Aruba den casonan di libertad di prensa. “Mi tabata kier a soluciona e asunto aki prome pa preveni e mal evaluacion aki.”
Cuatro instancia mester a tuma paso den un caso asina cu ta Gobierno di Aruba, Hulanda, Polis y Ministerio Publico. E ultimo aki, por medio di Procurador General, kende a seponeer su caso y a admiti cu tabata un eror, a pidi su disculpa y a kita tur e datonan di Henriquez for di e registro. Esey a sosode dia 8 di januari. VNO den tur asunto a manda informacion robes pa esnan concerni na Hulanda pero esaki mientrastanto tambe a wordo coregi y el a haya un carta di Hulanda cu disculpa. Awo falta Gobierno di Aruba y Polis pa acepta cu nan a actua robes cu prensa y specificamente cu su persona.
Si e limitacion di trabou di prensa ta parti di e normal nobo, Aruba ta perdiendo su estado democratico, Henriquez a bisa tambe. P’esey e ta pidi pa tur prensa sigui lucha pa derecho fundamental di prensa na Aruba.
Para dilanti Warda di Polis, el a pidi pa saca su datonan for di registro di polis. “Mi ta lamenta cu no por a soluciona e asunto aki prome cu e evaluacion a bini. Hulanda ta hopi halto den proteccion di periodistanan. UE ta hinca miyones den proteccion di periodistanan. P’esey ta importante pa keda na un puesto halto den e registro.”
