Periodismo di 24ora.com ta parce un pisca bomba cu manipulacion di informacion

No ta lamentable pero un berguensa grandi pa scucha y mira ora un “periodista” y media den nan sed di venganza ta raporta un caso cu ta yena di insinuacion y difamacion. Simplemente pa core bay den aire prome, y sin busca informacion of haci research prome cu manda algo den aire.
Tabata den oranan di mainta cu Landsrecherche a yega na e cas den Papayastraat cu un ordo di Corte. Hues Comisario a duna autorisacion na Landsrecherche pa den e investigacion Diamante tene huiszoeking. Y documento di HC ta bisa cu esaki ta den e caso di Alvin Alfonso Howell y Jacqueline Deborahe van Putten y Fundacion Hunto Nos Por.
Si e website 24ora.com ta broma cu nan ta e miho y esun cu mas fuente, anto nan lo mester tabatin e documento aki den cual ta para specificamente ki caso e ta, ken ta e sospechosonan y di kico nan ta wordo sospecha. E oficina estableci na e adres Papayastraat niun momento ta para como sospechoso ni su director.
Farrah Boekhoudt ta lamenta inmensamente cu den e transmision den forma continuo tabata haci insinuacionnan cu nada no ta cuadra. A mescla diferente investigacionnan di Landsrecherche den otro pa djis perhudica hende y esaki ta muestra di con bruha nan ta funciona y nan informacionnan.
Otro cos ta cu for di cuminsamento ta papia di un “inval relaciona cu caso Flamingo”. A menciona tur e acusacionnan contra e expolitico Otmar Oduber, a menciona otorgamento di tereno na Farrah Boekhoudt cu lo tabata bou di investigacion, cual no ta cuadra cu berdad. Pa casi henter e transmision a keda pusha pusha pa daña nomber di Farrah Boekhoudt, insinuando cu di un forma of otro lo ta envolvi den actonan iregular. “Foei. Un berguensa. Tristo cu tin tipo di hendenan asina trahando den prensa. En bes di keda neutral of por lo menos busca pa sa kico e inval tabata, a scoge pa scupi nan gal, manera a bin ta haciendo pa ultimo añanan cu diferente caso y contra diferente hende den comunidad. Tipo di manipulacionnan asina ta mustra e categoria y nivel di e trabou cu nan ta presenta pa e pueblo di Aruba, cu ta un victima di nan. Nan ta lubida di menciona nan mesun iregularidadnan, unda cu den RDA a cobra sumanan extraordinario pa trabou cu no tabata bal esaki. Esey ta e motibo cu tin investigacion andando di RDA. Nan ta un berguensa pa Aruba. “
E ultimo mensahe ta: Pueblo den bo ta pa scoge e canal cu ta brindabo informacion sin manipulacion y comerciantenan tin e poder di frena e tipo di periodismo aki.