Presidente di e Fundacion Balorando Polis Pensionado Emiliano Baarh a dicidi di lanta e fundacion aki mirando e sacrificio cu su ex coleganan a haci den pasado pa e trabou duro di polis , principalmente e dicho cu tin “ No duna hende e balor of duna nan rosa pa hole ora nan ta morto” , pero duna nan aprecio ora nan ta na bida pa nan por sinti y gosa cu nan ta balora. Esaki ta e motibo cu e fundacion a nace y e ta e prome fundacion pa polis na Aruba, pa polisnan cu a baha cu pension na momento cu nan ta. Segun Presidente di e Fundacion Balorando Polis Pensionado Emiliano Baarh esaki ta e di dos evento di e pensionadonan unda cu nan ta bini hunto y keda honra y na mes momento desea otro feliz dianan di fiesta.
Tin polisnan activo den KPA cu por bisti nan uniform y ta keda reconoci di ta un polis , pero e pensionadonan no tin uniform mas pero nan ta keda reconoci cu e PIN cu nan a ricibi unda cu ta bisa “Polis pensionado Aruba” riba e escudo oficial di KPA. Un danki ta bay na Korpschef Ramon Arnhem cu a aproba e idea aki.
E simbolo aki ta importante y e respet cu ta keda duna na nan na momento cu nan bay un evento di polis y uza e PIN aki pa asina nan por keda reconoci na e generacion nobo di polisnan cu a bin y cu no conoce nan den tempo di nan tempo. E grupo di pensionado nan aki ta e polisnan cu a traha duro y cu e crea e caminda pa un KPA cu Aruba tin awe.
Presidente di e Fundacion Balorando Polis Pensionado Emiliano Baarh ta gradici cada un di e pensionado nan aki pa nan dedicacion y trabou den KPA. E pensionadonan cu no a logra ta presente na e evento pa un motibo of otro , e fundacion lo percura di yega unda cu nan ta na Aruba pa asina haci entrega di e PIN manera debe ser.
E grupo di pensionadonan aki ta keda e base di un cuerpo policial funda pa Aruba y te ainda leu a leu na momento cu tin mester di conseho ta bolbe bek cerca nan, Presidente di e Fundacion Balorando Polis Pensionado Emiliano Baarh ta considera e grupo di pensionado nan di polis aki ta “ een lopende Bibliotheek” nan experencia nunca lo bay perdi y esaki ta danki na nan , tin momento nos mester para keto un rato y pensa cu nos no mester bay inventa e wiel mirando cu e grupo di pensionadonan aki ta e grupo cu sa kico ta e strategianan y pasonan pa no haci mas debi cu e no ta funciona.
Un danki na tur polis cu ta cu pension, danki na nan dedicacion y trabou duro cu nan a haci pa awe e generacion nobo di polis por existi y por sigui cu e base cu nan a implementa na Aruba.
