For di 10 di novèmber 2022 nan ta presentá e plasentero pelíkula Casa Coco grabá bou di e dushi solo di Boneiru den teaternan di sine na Hulanda i for di 17 di novèmber por mir’é na Boneiru tambe. E pelíkula ta bai tokante e grupo di amigu di Rotterdam (Loes Luca, Richard Groenendijk, Gijs de Lange i Frédérique Spigt) ku tur aña ta pasa e temporada di wenter na Boneiru den penshon di Pleun Saris (Joke Bruijs). Ora ku Pleun deskubrí ku su amor di tempu ku e tabata hóben, Toon Emmers (Gerard Cox) tambe ta forma parti di e grupo, esaki ta lanta basta stòf. Por mira tambe Katja Schuurman, Oscar Aerts, Tania Kross, Pamela Teves i Chris Tates den e pelíkula tropikal di hari akí pa grandi i chikí. Por mira ‘trailer’ di e pelíkula akinan.
Grabashon di e pelíkula a tuma lugá den luna di yanüari i febrüari 2021 na Boneiru, kaminda Kas Hamaka a sirbi komo lokalidat prinsipal. Huntu ku algun eseno den Casa Calexico, e akomodashon akí a forma e dekòr pa e penshon fiktisio ‘Casa Coco’. Otro grabashonnan a tuma lugá na Delfins Beach Resort, Klein Bonaire, 1000 Steps i Sorobon. Durante estadia di e aktornan i e tim di filmashon tabatin tempu tambe pa eksplorá nos isla i relahá, entre otro durante un paseo den boto di bela durante bahada di solo ku Epic Tours. Presensia di e grupo grandi di hulandes konosí, e asina yamá Bekende Nederlanders òf BN’ers, na Boneiru a sòru pa bastante kibramentu di kabes pa produkshon di e pelíkula, pasobra den e periodo ei tabatin un ‘lockdown’ i un konseho negativo di biahe relashoná ku Covid-19. Sinembargo na nos isla Boneiru ku tabata seif i yen di solo, e grabashonnan por a tuma lugá sin ningun estorbo.
E storia di Casa Coco: Pa hopi tempu kaba Pleun di Rotterdam (Joke Bruijs) ta manehá un Penshon na Boneiru, kaminda e ta enfoká riba wéspetnan ku ta buska reflekshon i trankilidat. Den práktika esakinan ta prinsipalmente hende di Rotterdam for di su propio sírkulo di konosí, ku ta apresiá pa ta huntu ku otro. Asina tambe Pleun su frei di tempu ku e tabata hóben, yamá Toon (Gerard Cox), kende despues ku su kasá a anunsiá ku e ke divorsiá di dje, a bini ku un pareha ku e tin amistat kuné i a ripará ku bou di e solo boneriano e dianan ta ménos shinishi. Pleun a edifiká Casa Coco hasié un Penshon situá na un sitio fantástiko, pero pa motibu di kompetensia ku ta oumentando, despues di e promé añanan eksitoso, awor akí su empresa ta drai ménos bon. Net ora ku Pleun i Toon ta yegando mas serka di otro, Toon ta deskubrí ku eksistensia di Casa Coco ta kologá na un hilu fini. Teun ta logra salba e Penshon i rekonkistá su amor di den su hubentut?
Greenfield Film Productions i Messercola a produsí e pelíkula. Direkshon di e pelíkula tabata na enkargo di Bob Wilbers i Jacqueline Epskamp a skirbi e senario ku koperashon di Maria Goos, Peter Römer i Gerard Cox. Dia 10 di novèmber 2022 e distribuidó di pelíkula WW Entertainment ta estrená Casa Coco den teater di sine.
