‘Pega’ na Burning Man

Burning Man, un festival annual cu ta tuma lugar na Black Rock City, den e estado di Nevada, na Merca a cuminsa siman pasa diadomingo, pues 26 di augustus. Diabierna ultimo 1 di september, e festival a keda interrumpi pa motibo di awacero fuerte y participantenan a ricibi instruccionnan di e organizacion pa tuma refugio di e awacero mientras cu esaki tawata cai den e area.

E sitio di e festival a ricibi mas di un centimeter di awa durante e anochi di diasabra, e organizacion a splica. Mientras e awacero a para pa gran parti di e dia di diasabra, tawata di spera tormenta den oranan di atardi y mainta di diadomingo, cu posibilidad pa algun tormenta. E situacion di e area di festival a hasi cu e oficina di Sheriff di Washoe County a dicidi di limita e acceso rond di Black Rock City, cu excepcion pa servicio di emergencia. Segun e oficina di Sheriff di Washoe County ta splica riba e plataforma social ‘X’, anteriormente conoci como Twitter, “Entrada pa e festival di Burning Man ta keda sera pa e resto di evento”. Na mesun momento, e aeropuerto pa drenta y sali di Black Rock City ta keda sera te proximo aviso.

 E festival di Burning Man a termina ayera, pues dialuna 4 di september, pero segun e organizacion ta splica, e participantenan lo por keda pega na Black Rock City pa varios dia, pa motibo di e lodo cu e awacero a crea. Mientrastanto, miles di participante na e festival di Burning Man a wordo pidi pa conserva cuminda, awa y combustible. Videonan riba medionan social ta mustra participantenan di Burning Man ta cana den e camponan inunda y lama denso di lodo. Riba e imagennan riba rednan social por a mira bañonan portátil, camper y hende pega den lodo. Algun persona a opta pa mara saco di sushi rond di nan sapato, pa asina esaki no muha y keda tur tapa na lodo.

Black Rock City
Black Rock City ta un comunidad temporal cu ta surgi tur aña meimei di e disierto grandi, mihor conoci como “the playa” pa Burning Man. E comunidad improvisa aki ta hospeda mas cu 60.000 persona tur aña y ta un biahe di mas o menos 3 ora desde e aeropuerto mas serca, na Reno, Nevada.