Aleluya, si un cos malo ta ripiti den bo bida cada rato, y ta parce manera bo no por stop, tin dos cos cu ta posibel, sea ta un capricho personal, of ta un cadena cu e enemigo kier pone riba bo , pa bo no alcansa e proposito cu Dios tin pa bo bida.
Pero tin un cantica cu antes tabata wordo canta den tur iglesia, y tur hogar caminda famianan ta reuni pa alaba Dios, cual ta un cantica di liberacion cual ta bisa:
Hesus Cristo ta kibra , tur cadena e ta kibra, tur cadena e ta kibra, pa mi libertad.
Lo mi dune tur Gloria 3x.
Lo mi canta Aleluya 3x.
Pa mi libertad.
Y su traduccion ta existi den tur idioma pasobra e ta un cantica, cu ta yama presencia di Dios y ta aleha y kibra tur plan di e enemigo.
Tin hende ta mara na capricho den nan bida cu na mes ta busca y gusta , cu pa un temporada nan ta hacie, pero pa un temporada nan no ta hacie, pero ora nan stop, no ta nifica cu nan a arepenti, pero tin un spirito di manipulacion ta drenta y ta tuma control riba nan bida, y nan ta purba di gaña, pero na final e cos ta ripiti y ta resulta cu ta bo mes bo ta gaña.
Por ehempel capricho di parranda, meti den bar di prostitucion, infieldad, gamble, y tur otro actividad cu ta kita bo tempo precioso pa famia , y ta trece discucion den cas. No ta cosnan cu mester ta temporal, pero pa bo integridad y bienestar, fisico, spiritual y familiar bo mester arepenti y aparta for di nan.
Pero si por si acaso un persona por cay den criminalidad, ladronicia, bruheria, droga ( adiccion) e no tin mester di keda den mes un situacion pa semper, pesey e palabra di Dios ta bisa den 2 Corintionan 5:17 ; pesey si un hende ta den Cristo ta un criatura nobo e ta . e cosnan bieu a pasa kaba , y ata tur cos a bira nobo.
Tur cos ta cuminsa cu un bida nobo den Cristo y despues di esey tur sobra cadena cu por tin den bo bida, ta wordo kibra den nomber di Cristo Hesus, pasobra den e sanger di Cristo Hesus tin poder.
Serca Dios tur hende tin oportunidad ( Salmo 103 vers 8-12) y tambe den 1 Juan 1 vers 9 ta para scirbi : Si nos confesa nos picanan, E ta fiel y husto di pordona nos, nos picanan y pa limpia nos di tur inhusticia.
Hende den nan mal deseo pa otro, kier keda marca otro pa semper, pasobra ta esey ta loke diabel kende ta e acusador kier pone den mente di hende pa nan no lanta cabes , y asina keda bao di e dominio di e malbado y keda ripiti mesun cos malo aña aden y aña afo.
Pero mescos cu Saulo di Tarso tabatin un encuentro cu Dios, y mescos cu David a arepenti di su adulterio y crimen, asina tambe tin un oportunidad pa tur esnan cu ta desea nan libertad den Cristo Hesus.
Un libertad cu ta cuminsa ora bo ta pordona bo prohimo, y pordona bo mes, y reconoce cu bo mester di Hesus Cristo den bo curazon, pasobra solamente E ta e Caminda di berdad y bida.
