Ta reina un materialismo asina grandi riba mundo cu hende no kier tende ni tampoco warda riba Dios.
Decision ta wordo tuma descabeya, cu despues ta duna nos hopi cos di lamenta, hende ya no kier tuma tempo pa haci locual Salmo 37 vers 3+4+5 ta bisa; Confia den Señor y haci loke ta bon,biba den e tera y alimenta bo mes cu Su fieldad . Deleita bo mes den Señor y E lo dunabo e deseonan di bo curazon. Encomenda bo caminda na Señor , confia tambe den dj’E y e lo hacie.
Tur biaha cu nos haci cosnan sin warda of spera riba Dios nos tin di carga cu e consequencianan. Moises kier a saca e Hebreonan for di Egypto cu forsa bruto, y e a mata un egipcio y despues su mes paisano a papia di e asunto, causando cu Moises mester a huy for di Egipto y a pasa 40 aña den desierto den isolacion cuidando carne di su suegro Jethro. Ora Moises tabatin 80 anja Dios a jame y Dios a dune orden pa bay saca e pueblo Hebreo for di Egypto.
Pero laga nos nota bon cu Dios no a dune arma ni tampoco ehercito, pero a dune un bara y a cubrie cu Su presencia y a bise ora Faraon puntra bo ken a mandabo, bise Señor a manda bo.
Laga nos wak bon , pa splica nos yuinan con Dios ta obra, Moises a bay dilanti di e homber mas podersoso militarmente den e tempo ey cu simplemente un bara den su man y a demanda libertad di un pueblo oprimi. Y e a logra pasobra Dios tabata cune y e a siña warda riba Dios.
Awendia hopi hoben tin e pensamento, cu nan por pone cosnan sosode manera nan kier, pasobra no tin conocemento di e palabra di Dios, of nan conoce e palabra pero nan no kier obedece.
Pa straño cu nos por bisa ta cu realidad di bida ta demostra : Cu como hobensita bo a sali na estado di un hobensito y boso tin un yiu , esey no ta garantia cu ora e hobensito bira mas grandi e lo permanece hunto cu bo.
Mescos ora un mucha homber saca un hobensita na estado y boso tin un yiu, esey no ta garantia cu ora e hobensita bira mas grandi lo e permanece hunto cu bo.
Hende ta bira grandi y pensamento ta cambia, y aunke boso tin un yiu, hopi biaha e yiu ey no ta e candal cu ta mara boso hunto.
Ta pesey ta bon pa warda riba Dios, pasobra pa falta di warda riba Dios tin hopi hende ta cana bao di stress y depression, tin hopi pleito y hopi violencia, y tin hopi abusador ta cana rond, pasobra nan no por soporta ora pensamento di hende cambia.
Moises tabata un gran lider, pero toch durante su gran ministerio cu Dios a dune e a haci un fout grandi, y como resultado e y su ruman Aaron no a obedece Dios, y asina nan no a drenta e Tera Priminti.
Mayor por fabor lesa e historia aki pa bo yiunan tende, y hobennan haci un esfuerso y Google e historia cu lo cambia bo bida y lo bo siña warda riba Dios y no haci manera bo kier. ( Numbernan Capitulo 20 v 1-13).
Tur hende mester siña warda riba Dios y tur cos lo sali bon.