Dios tene misericordia, ya nos no por tapa solo cu un dede, ni tampoco sconde e berdad, e uso di alcohol y droga bao di nos hubentud ta alarmante.
Esey tambe ta loke ta pusha nos muchanan , y pone nan cana tanto cu arma blanco, como arma di candela.
Nos no ta papiando di mucha homber so, pero uso di alcohol serca mucha muher bao di edad , a bira extravagante.
Den weekend mucha muher bao di edad ta wordo mira burachi, y hasta dialuna mainta nan ta sigi bebe ,manera ta un necesidad , y hopi di nan ta maneha auto, y bo ta puntra ta serca ken nan por haña auto fia , ken ta coopera cu maldad?
E situacion ta alarmante, caranan nobo riba caya como adicto y hopi di nan ta bao di 20 aña.
Mientras cu politiconan ta pusha pa pasa un ley pa cos di bon bida, pa hendenan cu solamente kier mira nan capricho wordo halsa y no tin respet pa Dios.( Romanonan 2:5).
Caya ta yora di hobennan cu ta perdiendo nan scol y futuro, pasobra no tin un plan serio y concreto con por sikiera yuda den e dolor cu ta creciendo riba e lugar aki.
Aña tras aña , cos ta sigi mesun cos, prioridad robes ta haña preferencia, mientras cu nos isla ta bay den scuridad, pasobra ta parce cu no tin solucion.
Cuanto di nos hobennan no ta sera, pa motibo di droga, alcohol, arma, matamento etc, pero ta parce manera tur hende ta lanta un rato for di soño ora algo tristo tuma lugar, pero despues ta tuma un vacantie pa drumi atrobe.
Hobennan tene cuenta cu lo siguiente ta para scirbi: No laga ningun hende gaña boso: Mal compania ta daña bon custumber.( 1 Coriontionan 15:33)
Hoben den nomber di Cristo Hesus di Nazaret nos ta rogabo pa kibra cu tur mal amistad , sali for di gang, arepenti y duna Hesus e prome lugar den bo bida, y honra bo tata y bo mama pa tur cos bay bo bon.
Wak cuanto problema nos tin awor aki cu alcohol, droga, violencia,ladronicia y hasta atraco a cuminsa lanta cabes bek, y nos ta yegando na cuminsamento di December.
Con nos lo ta den tempo di Pasco y aña Nobo, tempo di Carnaval tambe lo drenta y bay termina na famoso campamento?
Mayor bo mes sa cu for di awor aki bo bista mester ta mas constant riba bo yiu, unda e ta bay y cu ken e ta cana.
Tur cos ta permiti pa mi,ma tur cos no ta cumbini, tur cos ta permiti pami, ma lomi no laga nada domina mi.( 1 Corintionan 6:12).
Tin hende asina iresponsabel cu nan mes ta siña na yiu bebe for di chikito, y hasta tin di nan ta permiti yiu usa droga gewoon na cas.
Pakico sembra algo den bo propio famia, cu mayan cu Dios kier lo causa bo dolor, pasobra tur locual hende sembra nan lo cosecha.
E situacion di berdad ta critico, nos tin mester di ningun experto bini for di afo , pa constata cu nos mester pone man na obra ayera, y stop di haci wega cu dolor di Famianan.
Buracheria bao di hubentud, cual ta causa cu nan ta cay riba caya y cu nan amigonan ta corre bay laga nan, bebemento ta pone cu nan no ta razona, y ta busca violencia cu otro.
Nos mester haci hopi oracion pa saca hubentud for di gara di diabel, y duna nan un bida decente.
