E luna di December aki no a habri masha bunita, nos ta mira accidente di trafico cu morto , violencia, buracheria, rebeldia, inmoralidad,falta di respet pa mayornan , arma riba caya etc .Nos ta pidi Dios tene misericordia pasobra dianan di fiesta ta asercando.
Ta un momento pa para keto e reflexiona, locual bijbel ta bisa, y locual hopi hende no kier tende.
Bijbel ta papia di tempo trabahoso, bijbel ta papia di huy for di pasion hubenil ,y inmoralidad,tambe cu hende lo bira stimado di nan mes.arogante cu mala lenga.
Locual ta para scirbi ta cumpliendo ( 2 Timoteo 3 :1-9) y nos tur mester tene cuenta cu esaki, y e unico manera pa nos por sali for di e situacion aki ta pa medio di oracion.
Awor mas cu nunca nos mester cuminsa haci oracion pa nos Cuerpo Policial, Aduana, y tur esnan cu ta eherce control riba nos isla, pa nan tin forsa pa tur locual tin na caminda, pasobra horea di hopi hende a sera y hopi kier bira lomba pa ley y haci locual cu nan kier.
Hende no ta respeta bida di otro mas, hende no kier reconcilia, hende no kier mantene nan mes na ningun clase di regla,y e temor di Dios ta cabando. Mayoria di e problema cu hubentud tin ta sinta den e falta di honra nan mayornan, e gran falta di respet cu tin awendia, caminda muchanan no kier scucha di nan mayornan, y hopi ta e mayornan cu ta yora y cu tin hopi dolor.
Muchanan cu sa, of tin cu no, cu cada biaha cu bo ta falta respet pa bo mayor, bo ta faltando respet na Dios. Y bo tin di carga e consecuencia, pasobra locual Dios ta bisa pa bo honra bo mayornan ta un mandato y ningun hende por pasa over di e palabra di Dios.
Nos mester haci oracion pasobra Hesus mes a bisa den Mateo 19:26 : Hesus a keda waknan y a bisa nan: Serca hende esaki ta imposibel, ma serca Dios tur cos ta posibel.
Tur locual nos presenta den oracion den nomber di Cristo Hesus,nos Tata cu ta den cielo lo scucha y lo hacie pa nos.
Nos mester ora pa e situacion bira normal, e cosnan aki cu ta sosode den trafico no ta normal, e uso di droga y alcohol ta creciendo, y na otro banda nos ta mira cu violencia no ta keda atras.
Ta tempo pa cada mayor papia cu nan yiu, y cada hende grandi para keto un rato, y reflexiona riba e asunto di respet, y corda como mayor nan mester ta un ehempel pa nos hubentud.
Muchanan mester corda cu nan ta e embahadornan di futuro, y cu un karakter swak yena cu inmoralidad nan no ta yega ningun caminda, y nan mester corda cu respet pa bo mes y pa hende mayor cu bo ta habri tur porta den bida.
Palabra di Dios ta bisa: Gracia sea cu boso,y pas di Dios nos Tata, y di Señor Hesus Cristo. Kende a duna su mes pa nos picanan,pa E por a libra nos di e siglo malo di awor aki, conforme e boluntad di nos Dios y Tata. Na Kende sea gloria pa semper y semper. Amen (Galationan 1:3-4).
Tene cuidao pa boso curason no ta carga pa causa di paranda y buracheria y e preocupacionnan di bida, y e dia ey no bin diripiente riba boso manera un trampa.Ma sea alerta tur ora bay haciendo oracion, pa boso por tin forsa pa scapa di tur e cosnan aki.(Lucas 21:34-36).
