UN YAMADA NA TUR FAMIA.
Dios kier pa nos biba den union cu otro, Dios kier pa nos stima otro, Dios kier pa nos cuida otro , pasobra asina nos ta demostra cu nos ta yuinan di Dios.
Caminda tin union e Spirito di Dios ta biba y ta reina, pasobra eynan Dios ta manda su bendicion.
Un famia uni ta un demostracion cu Dios ta meymey di nan.( Salmo 133).
Nos a wordo crea pa biba den union cu otro.( Juan 17:21) y desunion ta solamente un muestra con leu nos a hala for di Dios.
Ban bek na e mesa di oracion.
Tur famia mester bolbe bek na e mesa di oracion den cas, ta bon cu cada persona ta haci oracion den su camber, pero e oracion cu mas ta demostra obedencia na Dios , ta e oracion caminda tur hende den cas ta baha nan cabes y uni cu otro den oracion, y eynan nos ta mira obedencia na Dios su Palabra.
Den Mateo 18 : 19 +20 Señor ta bisa :Atrobe mi ta bisa boso cu si riba tera dos di boso bay di acuerdo tocante cualkier cos cu nan pidi, esaki ta wordo haci pa nan door di mi Tata cu ta den cielo.
Pasobra caminda dos of tres ta reuni den Mi nomber ey Mi ta mey mey di nan.
Awor nos tin di reconoce e balor di oracion den famia tur hende hunto na mesa, of tur hende para den cas ta tene man, of tur hende hunto na rudia, buscando di Dios, y Dios lo agrada cu e famia aki, pasobra nan ta demostra nan unidad den Fe.
Pa hopi tempo esaki a bay for di moda, hopi famia a bandona Dios, hopi no ta kere mas y hopi ta asina ocupa den nan mes cosnan cu nan no ta sobra tempo pa Dios. Parce cu Dios a wordo poni un banda y cas di Dios no ta wordo bishita, materialismo a tuma over treciendo asina stress y depresion den cas, y esaki ta e resultado ora nos laga cosnan di mundo ocupa lugar di Dios den nos bida.
Ya no ta tempo di hunga llanero solitario mas den cas pero ta tempo di uni den oracion, pasobra dianan ta dificil, y solamente uni nos lo vence, mester tin firmesa y obedencia den henter famia, mester tin temor di Dios den henter famia.mester tin respet un pa otro,
Ora nos ta den un situacion den nos propio cas cu nos no por haci oracion hunto, esey ta nifica cu nos tin un problema, pasobra si tin un hende den idolatria, e tin di bandona e cosnan ey pa e union di Dios por reina den cas.Un cas no por tin dos baas, pasobra Cristo Hesus ta Rey y Señor den tur cas.
Laga nos pone tur pleito, odio, orguyo, y arogancia un banda y trata otro netji, pasobra nos Dios ta un Dios di orden, y caminda tin orden eynan Dios ta, asina tin desorden e Spirito di Dios ta move bay , pasobra Dios ta exigi union di nos.( Efesionan 4;29).
Ora nos kier mira man di Dios move den nos hogar, nos mester laga un banda: Tur amargura, odio, griteria,furia , rabia, y calumnia , hunto cu tur malisia wordo kita for di nos. Y nos mester pordona otro mescos cu Dios den Cristo Hesus a pordona nos.( Efesionan 4:30-31).
Ban trece Union, Fe y Oracion bek den nos cas.
