E palabra di Dios ta cumpli dia pa dia, y hopi hende ta keda straño di locual nan nos ta mira sosode pero nos tur tin di corda cu e cosnan aki ta para scirbi. Pero tambe ta para scirbi cu nos mester somete nos mes na Dios, resisti e diabel y lo huy for di nos.
Awendi nos ta mira manifestacion di enemigo di dia cla, cosnan ta sosode cada rato cu ta demostra con hende a aleha for di Dios, y ta bibando pa nan mes.
E palabra di Dios ta bisa cu esun cu perservera ta na final esey lo vence, pero pa nos perservera nos mester resisti e maldad, y e unico forma cu nos por resisti ta den oracion, ayuno, vigilia, pasobra den esey nos ta ricibi forsa di Dios.
Sea sobrio, sea alerta. Boso adversario e diabel ta cana rond,manera un leon cu ta gruña , buscando ken e por devora. Ma resistie den boso fe, sabiendo cu boso rumannan den henter mundo ta pasando door di mesun experiencia di sufrimento.(1 Pedro 5:8-9)
Nos no por djis acepta tur cos cu ta sosode y baha cabes pa tur cos, pasobra nos ta sirbi un Dios cu ta Santo, Grandi y Todopoderso, cu na tur momento nos por aserca su trono di gracia y ricibi yudansa.
Pesey e oracion ferviente di e husto por hopi, pasobra ora Dios scucha nos oracion, Dios lo manda multitud di angel na defensa di esnan cu tin temor di Dios.
Pesey somete boso na Dios. Resisti e diabel y elo huy for di boso. Hala serca Dios y E lo hala serca boso. Limpia boso mannan boso pecadornan y purifica boso curason , boso di curason dobel.( Santiago 4:7+8).
No stima mundo, ni e cosnan cu tin den mundo. Si un hende ta stima mundo, e amor di e Tata no ta den dje, pasobra tur locual tin den mundo, e deseo di carni y e deseo di wowo y e orguyo di bida, no ta bin di e Tata, sino di e mundo.( 1 Juan 2:15-16).
Den tur cas mester tin oracion diariamente, pasobra solamente asina nos por para firme y resisti e ola di maldad cu ta pasando tur dia,y riba tur cos , tumando e escudo di Fe,cu cual boso lo paga tur e flechanan sendi di e malbado.
Sin oracion ta dificil pa nos hogarnan keda para, pasobra nos tur lo wordo purba den e tempo aki pa nos sa na unda nos fe ta y ken nos ta sirbi, no ta tempo di haci wega, pasobra e diabel no ta haci wega , y nos tin cu reconoce cu ta solamente Cristo Hesus tin e palabra di berdad y bida.
Tene cuidao pa boso curason no ta carga pa causa di paranda y buracheria y e preocupacion di bida y e dia ey no bin diripiente riba boso manera un trampa. Pasobra e lo bin riba tur esnan cu ta biba riba superficie di henter mundo. Ma sea alerta tur ora bay, haciendo oracion pa boso por tin forsa pa scapa di tur e cosnan aki cu ta bay tuma lugar y para dilanti di e Yiu di hende. ( Lucas 21:34-36).
E Yiu di Dios a aparece pa destrui e obranan di e diabel, pesey nos tin e confiansa cu ora nos haci oracion den nomber di Cristo Hesus e enemigo mester huy bay.
Awe mas cu nunca como pueblo nos tin di bini dilanti di Dios, cu un curazon humilde pa Dios den su misericordia duna nos forsa pa resiti tur maldad, pasobra den Cristo nos ta mas cu vencedor.
