Ta keda na tur hende pa tene bon cuenta, pa nan telefon enbes di ta un instrumento di comunicacion y technologia, no bira un instrumento di idolatria den nan bida.
Pasobra e telefon cu nos tin den actualidad, ta traha pa hala atencion di hende, door di su capacidad, moderno y technologico.
Pero ora hende cuminsa kere cu nan telefon ta mas importante cu Dios y cu sin telefon no tin bida, y si lubida telefon na cas, nan ta bira menos productivo na trabao, of ta bira malo pa bay cas, pa asina nan por tin e telefon, e telefon ta cohe dominio riba nan bida, y asina bira parti di idolatria.
Y cuanto hende actualmente no ta bibando den un situacion, caminda tur cos ta telefon, y ora no tin data, tin nervio, y ora no tin caarchi, tin zundramento, y ta pasa henter dia riba e telefon, mientras cu hasta deber di cas ta cay atras.
Accidente den trafico pa motibo di telefon.
Boet halto pa paga , pa motibo di papia na telefon ora ta stuur.
Pasobra no por pone e telefon for di man un momento, y nos no ta papiando di mucha, pero tambe di hende grandi cu ta biba bao di dominio di telefon.
Si hende por tabata asina activo den cosnan di Dios, nos lo tin un comunidad, completamente diferente.
Dios kier pa nos ta sirbido ferviente di Señor, hende cu curason dedica na Señor, cu tin Cristo Hesus na prome lugar den nos curason.
Ora nos ta ferviente den sirbi Señor, nos oracion tambe ta bira ferviente y un oracion frecuente haci door di un persona ferviente ta hala atencion di Dios.( Daniel Capitulo 6( 1 Tesalonisensenan 4:17).
E beneficio di sirbi Señor ferviente , ta garantisa nos bida y nos pan di cada dia( Mateo 6:11).
E ta sigura favor di Dios riba nos bida.( 1 Corintionan 15:10),
E ta trece goso den nos bida ( Lucas 10:17).
E ta engendra fruta sobrenatural den nos bida,( Exodo 23:26).
Oracion ferviente ta establece relacion solido cu Dios.( Revelacion 2:17).
Oracion ferviente ta uni nos cu Dios ( Hechonan 8:18-22)
Oracion ferviente ta trece pas y trankilidad ( Mateo 11:28-29).
Oracion ferviente ta trece sanacion den Curpa, Mente y Spirito, ( Isaias 38:5).
Oracion ferviente ta habri cielo y comanda favor di Dios. ( Genesis 39:21).
Oracion ferviente ta trece recurso abundante. ( Mateo 14-13-21).
Oracion ferviente ta siña bo conoce bo Dios.(Juan 10:3-5).
Oracion ferviente ta haci nos madura den gracia y pasenshi ( Filipensenan 4:6-7).
Oracion ferviente ta crece bo fe den Dios ( Mateo 21:21).
Oracion ferviente ta trece sabiduria divino.( Jeremias 33:3),
Ora nos ta sirbi Dios cu un curason ferviente, nos ta ricibi revelacion di Dios, pasobra Dios ta mira nos anhelo, y disponibilidad, y esey ta haci nos personanan cual Dios ta confia y por duna nos encargo pa cumpli cune.
Dios conoce cada curason y no ta bay duna encargo na un hende, cu no tin interes den e asuntonan di Dios.
Pesey hopi hende ta envidia otro, pa e manera cu Dios ta usa un persona, pero nan no ta tene cuenta cu e persona ta ferviente den cosnan di Dios.
E diacono Esteban tabata un homber ferviente yen di Fe y di Spirito Santo, tabata haci maraviya, y milager grandi den pueblo, y hendenan cu no ta kere,no tabata por mas cune,nan a bira furioso y nan a lanta falso testimonio contra dje, locual a costa su bida.Esteban a wordo piedra mientras cu e tabata predica e Palabra.