Pastor Marcel Balootje: Un bon consehero ta sinja bo obedece Dios

Ta masha bon y bunita, ora nos ta tuma conseho, pasobra bon conseho ta yuda nos cana den bon caminda, y ta hiba nos na exito.

Pero den e tempo trabahoso cu nos ta bibando, nos mester tene na cuenta di unda e conseho ta bini, y si e conseho aki ta den obedencia na Dios, of e conseho ta un conseho materialista, orguyoso, inmoral, yena cu pensamento mundano, pasobra tipo di conseho asina no ta hiba nos ningun caminda.

Ma ora e Spirito di berdad bini e lo guia boso den tur berdad,pasobra E lo no papia di Su mes, ma tur loke E tende, E lo Papia,y loke tin di bin, E lo revela na boso.

Semper ta bon ora ta tuma conseho pa busca pa sa di unda e conseho ta bini, cual ta e experiencia cu e persona tabatin den e stituacion cual abo ta pasando, pasobra awendia tin hopi ta usa un frase conoci bisando: Mi sa locual cu bo ta pasa den , caba nan no sa nada, pero locual nan ta haci ta pa abo papia y y a base di esey nan ta formula nan conseho, cual hopi biaha ta bini di nan mes, no tin un base stableci, y nan no por duna ningun referencia di locual nan ta papia..

Hopi hende kier ta consehero di hobennan, cual awendia bo mester tene cuenta cu Dios, ora bo ta papia cu un hoben pasobra, pasobra pa motibo cu hopi hoben a lanta sin Dios, awendia nos tin hopi hoben den problema social grave.

Cristo Hesus ta e consehero riba tur consehero pasobra ta para scirbi: 

Pasobra un yiu a nace pa nos, un yiu homber ta duna na nos, y e gobernacion lo ta riba Su schouder Su nomber ta: 

Consehero Maraviyoso,

Dios Todopoderso,

Tata Eterno,

Prins di pas. 

Lo no tin fin na e aumento di Su gobernacion y di pas,riba e trono di David y riba su reino pa stableci esaki y mantene, cu huisio y husticia, for di e tempo ey y pa semper.

E zelo di Señor di ehersitonan lo haci esaki. ( Isaias 9:6-7).

Probechando e tempo cu nos ta bibando aden lo lanta hopi consehero sin Dios, yena cu malisia di diabel, pa asina hiba hende den scuridad, y mantene nan den scuridad, consehero nan cu no ta duna cara pasobra nan no ta cana cu e berdad di Dios, pasobra e berdad no ta den nan, pero ta kere den fantasia, filosofia y idolatria den cual e Spirito di Dios no ta.

Cada ken cu lesa Isaias 9;6-7 y tuma tempo pa compronde y medita bon, ta ricibi pa nan mes, cu aki tin reponsabilidad total pa locual conseho ta rekeri, pasobra tin hopi consehero iresponsabel ta cana rond , kende ta hiba famianan den tristesa. ( 2 Timoteo 3:6-7).

Orguyo ta ocasiona pleito so, ma sabiduria ta cu esnan cu ta acepta conseho.( Proverbionan 13:10).

Semper den un bon conseho e nomber di Dios, y e guiansa di Dios, ta presente, y bo ta bay nota esey ora e conseho wordo presenta na bo.

Pero consehonan cu ta hiba mucha den rebeldia, contra na mayornan, siña yiu con ta bay contra su mama,bisa mucha bin biba serca bo, enbes di busca drechi, kico ta pasando , y con pa resolve e asunto no ta bini di Dios.

Conseho constructivo, ta bini di Dios, pero conseho destructivo cual ta hopi na moda, ta bini for di e diabel, cu solamente ta bini pa horta mata y destrui. ( Juan 10:10).