Ta masha importante pa nos lanta nos yuinan den caminda di Senor manera Efesionanan 6:1-4 ta siña nos , pasobra nos ta bibando den tempo trabahoso, y asina nan por evita problema social y spiritual.
Bijbel ta siña nos di seis cos cu Señor ta odia, si siete cos cu ta un abominacion pa Dios.( Proverbionan 6:16-19).
Nan ta:
Wowonan orguyoso ( Halsa).
Lenga mentiroso.
Man cu ta drama sanger inocente.
Un curason cu planea maldad.
Pianan cu ta lihe pa corre haci maldad.
Un testigo falso cu ta papia mentira.
Y esun cu ta sembra desunion entre rumannan.
Cuanto problema nos lo no evita si nos a siña nos yuinan for di chiki, tur esaki nan, y asina evita problema pa nan y pa nos mes.
Mayoria problema cu nos hubentud tin, ta bini pa falta di conocemento di locual Dios ta odia, y asina nan ta cay aden, y hopi biaha cu consecuencianan serio, mirando cu pa via di esaki varios a perde bida y tin te ainda ta den prison.
E palabra cu semper ta wordo usa. Ay no, No ta nada ta mucha, den e tempo di awendia , nos mester tene hopi bon cuenta cune , pasobra tempo a cambia y telefon y media por afecta bida di un mucha negativamente, si mayor no tuma control di esaki na tempo.
Un caracter orguyoso, den cual e pensamento di e mucha ta cambia, pesnsando cu e ta mas cu otronan, e no ta respeta, e kier haci locual cu e kier, ta dune problema tanto na tera como den cielo.
Pasobra Dios ta odia orguyo, pasobra orguyo ta bini di diabel, pasobra ta pa e motibo ey, Dios a sake for di cielo, pasobra e tabata un angel te na momento cu orguyo a subi su cabes.
Awor tin diferente motibo cu nos por ta orguyoso, por ehempel di nos ekipo favorito di deporte, di un yiu cu a duna tremendo resultado na scol etc.
Pero asina cu e orguyo ta bay contra palabra di Dios y ta halsa nos mes mas , cu e atencion cu nos tin di pone na Dios, e ta bira rebeldia contra Dios, y asina nos ta cay den abominacion.
Esey ta cos cu Dios ta odia, y hende cu ta haci cos cu Dios ta odia no por tin bon relacion cu Dios.
Nos mester splica nos hubentud bon cla esaki, pasobra e diabel a hinca den mente di hopi hende,cu ora bo ta spiertanan, nan ta tume como huzgamento.
Ora un hende ta spierta bo cu bo comportacion por hiba bo na castigo eterno, y asina bo no ta mira cara di Dios, no tume como huzgamento, pero e persona ey ta stima bo como prohimo, y no kier pa bo arepenti y no bay perdi.
Cada hende cu ta orguyoso di curason, ta un abominacion pa Señor, siguramente lo no keda sin castigo. ( Proverbionan 16:5).
Lipnan mentiroso, ta un abominacion pa Señor,ma esnan cu ta trata cu fieldad ta Su delicia.( Proverbionan 12:22).
Plannan di maldad ta un abominacion pa Señor , ma palabranan agradabel ta puro.( Proverbionan 15:26).
Pasobra e hende perverso ta un abominacion pa Señor , ma E tin comunion cu e hende recto. ( Proverbionan 3:32).
Esun cu ta haci su mes sordo pa no scucha ley,hasta su oracion ta un abominacion.
( Esaki ta nifica esun cu no kier scucha e palabra di Dios, lo tin problema cu Dios).
Ta bon pa nos hubentud ta bon na altura di tur esaki, na momento di scohe amistad.
