Pastor Marcel Balootje: Tur mayor mester realisa, cu bo no por lanta bo yiu sin Dios

Yuinan ta un regalo di Dios un gran bendicion, y un goso pa bida largo.

Hesus a bisa laga e muchanan, y no stroba nan di bin serca Mi , pasobra e reino di cielo ta pertenece na esnan manera esaki nan.(9 Mateo 19:14).

Tin tres area cu mundialmente ta wordo ataca, y cu nos tin cu spierta tur hende pasobra e asunto ta birando teribel, ta nos Muchanan, Matrimonio y Famia.

E deseo di diabel pa kibra e pilar di mas importante den comunidad cu yama Matrimonio y Famia ta incomprendibel.   

Nos tur sa cu una bes e matrimonio y famia ta kibra, dividi y destrui e yuinan por cay facil den man di e malbado.

Pasobra Dios ta demanda di tur mayor pa lanta nan yuinan den caminda di Dios, esey ta para scirbi den Efesionan 6:1-4. Tur educacion mester cuminsa na cas, deber di mayor no ta solamente, provee, financieramente y fisicamente , pero tambe spiritualmente.

Pasobra si nos no hacie e diabel ta cohe ventaha riba nos yuinan.

Instrui un mucha den e caminda cu e mester cana, y hasta ora e bira bieu e lo no aparta su mes for di dje.( Proverbionan 22:6).

Tin demasiado peligro ta bay rond , pa nos laga nos yuinan ta cana sin proteccion di Dios.

Ta nos deber pa siña nos yuinan haci oracion, lesa bijbel, scucha palabra di Dios y tambe canta alabansa.

Di tur banda e enemigo di nos alma, ta busca e muchanan inocente pa destrui, pa saca nan for di chikito for di e caminda di lus y hinca nan den e mundo perverso di scuridad.

E enemigo ta purba di tur manera di gaña nos muchanan, y tur caminda e noticia ta corre con na scolnan den exterior muchanan su mente ta wordo bruha tocante di nan sexo, cu mentiranan hopi baho bisando na mucha chikito por ehempel bo ta un mucha homber den curpa di muher, y bo ta un mucha muher den curpa di mucha homber.

Nos tin di wak bon pa e fenomeno aki no dal nos manera Corona Virus, pa nos no haña nos ta contamina, cu e asunto aki, pasobra den un poblacion chikito manera nos, e lo ta desastroso.

Contra Corona Virus hende por a bisti mondkapje,usa hand sanitizer, y tuma vacuna.

Pero contra e abominacion aki ta solamente e sanger di Cristo y e presencia di Dios den bida di nos yuinan, prome cu nos cuminsa manda nan scol, por salba e situacion.

Es mas tur hende mester a nota e spirito di crueldad cu ta biba bao di hubentud, con liher nan ta pa mata, con liher nan ta pa venga, y cu casi nan no ta pensa riba pordona at all.

Locual cu nos como hende grandi tabata cana bay antes, awor aki e a bira un punto di pelea, y por yega asina lew cu un simpel insulto por causa morto.

E necesidad di lanta nos yuinan cu e palabra di Dios ta mesun necesario cu cuminda den cas, 

Y e ta mas necesario cu e telefon. 

Pasobra ya e adiccion na telefon a bira algo incontrolabel. 

E enemigo a drenta den e asunto di telefon, cu hopi hoben ta kere cu nan por biba sin hende di cas, basta nan tin nan telefon.

Falta di telefon ta pone hoben bira depresief, falta di data ta pone nan rabia. y si e telefon mester perde e hoben tambe ta perde cabes hunto cune.

Ta tempo pa tur mayor realisa, bo no por lanta bo yiu sin Dios.