Hopi biaha ora nos ta tende hende papia y nos ta puntra di unda e pensamento nan ey ta sali,pasobra normalmente un hende mester pensa prome cu e papia y ora e ta papia cosnan negativo cu ta contra boluntad di Dios, nos ta comprende ta ken ta dirigi su pensamentonan.
Nos pensamento ta algo masha delicado, cu nos no por permiti e enemigo maneha , pasobra e lo causa desaster den nos bida, pasobra prome cos e ta yena hende cu malisia di un forma cruel, cu bondad ta aleha for di nan.
Hopi hende ta esclavo di diabel sin nan sa, pasobra asina cu bo mente ta contra e Berdad y Bondad bo ta bira esclavo di diabel, y ta solamente Cristo Hesus por librabo.
Loke ta sali for di hende, esey ta loke ta contamina hende .
Pasobra for di paden, for di curazon di hende , ta sali mal pensamento, fornicacion, ladronisia, matamento,adulterio, hechonan di cudishi,y maldad, tambe engaño, sensualidad, envidia, calumnia, orguyo y bobedad. Tur e maldadnan aki ta sali for di paden y ta contamina hende.( Marco 7:20-23).
Laga nos tur corda cu: E Lei di Señor ta perfecto, e ta restora alma, e testimonio di Señor ta fiel, e ta haci hende simpel bira sabi.( Salmo 19:7).
Senor ta haci hende simpel bira sabi, esaki ta nifica cu asina hende tin pensamento di violencia, suicidio, atraco, matamento, orguyo, arogancia, ladonisia, corre auto burachi, vengansa ,cherchamento di Dios,inmoralidad den tur sentido, ta bobedad hende ta practicando,e cosnan ey no ta bini di Dios.
Asina un hende mes por saca afo cual ta e spirito cu ta e ta permiti pa dirigi su bida, pasobra tur hende por escohe entre :
Entrega nan bida y nan curason y kere den Cristo Hesus manera Dios ta bisa den Juan 3:16 y asina ricibi bida eterna,y laga Spirito Santo dirigi nan bida.(Romanonan 8:14).
Of rechasa Cristo Hesus y entrega nan bida na maldad, inmoralidad y scuridad, laga diabel dirigi bo bida y asina muri y drenta fierno pa eternidad.(Revelacion 20:15).
Ta tempo pa nos tur haci oracion constantemente, mirando con e maldad ta hala nos hubentud bay cune, y con hende grandi cu mester sa mihor, diariamente ta proclama cu nan boca, contra e palabra y principionan di Dios.
E trabao di rescate ta hopi grandi pasobra di berdad, nos mester ta uni pa asina guia nos hubentud den e bon caminda, pasobra locual ta sosode cu violencia na scol y pafor di scol ta hopi serio.Tin hopi hoben cu no por bishita tur bario.
E nivel di violencia y mal pensamento ta hopi halto, y mester di hopi oracion den cas di famia, pa kibra cu e ola di scuridad aki, pasobra ora e nivel spiritual den famia baha, pa motibo di falta di oracion, y e famia cu no ta congrega ningun caminda, e enemigo ta tuma dominio den cas.
Finalmente rumannan, tur loke ta berdadero, tur loke ta honorabel,tur loke ta husto, tur loke ta puro,tur loke ta bunita,tur loke ta di bon fama,si tin algun birtud, si tin algo digno di alabansa,laga esakinan ocupa boso mente.( Philipensenan 4 ; 8).
Ta esaki ta e palabra cu cada mayor mester pusha den cabes di su yiu, pasobra e palabra aki tin mas balor, cu tur fiesta , cu un telefon, of un keds di marca, un scooter, y hasta un auto, pasobra e palabranan aki por scapa su bida, y tambe scapa bida di un otro persona.
Tin hopi terapia pa yuda nos hubentud, pero no lubida, si nos no hinca Dios aden ta tempo perdi.