Pastor Marcel Balootje: Tur hende su dia di muri lo yega

No ta cos di spanta y haña stress, pasobra ta algo cu ningun hende no por scapa di dje.

Mescos cu un hende ta nace , su dia di muri tambe ta yega, E ta duro pa perde un ser keri, pero esaki ta locual ta para scirbi: Y mescos cu hende ta destina pa muri un biaha so y despues di esaki ta bin huicio.

Asina Cristo tambe ,kende a wordo ofreci un biaha so pa carga e picanan di hopi hende, lo parese pa di dos biaha, no pa carga pica, ma pa salbacion di esnan cu ta sper’E.( Hebreonan 9:27-28).

Tin dos fecha cu ningun hende no por dicidi riba dje ta e dia di nace y e dia di muri. 

Pasobra solamente Dios tin control di esey , pasobra ta Dios tin e ultimo palabra den tur cos.

Ciencia y technologia ta keda chikito compara cu e Soberania di Dios.

Hopi biaha den un matrimonio ora nan ta spera un baby, especialmente ora ta di prome baby, tur hende ta ansioso pa sa e luna y ki dia e mama ta uitgeteld manera ta bisa den boca di pueblo. 

Pero Dios ta dicidi e fecha y e ora , si e yui tin di nace den auto, avion, riba caya, bao di palo ,den boto y tambe den hospital, ora Dios kier trece na mundo, ta Dios su desicion.

Mescos cu dokternan por duna 3 luna, of poco dia di bida, pero e ultimo palabra ta Dios ta dicidi.

*** Nos tin testimonio di un señora cu na Hulanda nan a bise cu no por opere, pa e bay Aruba , pa pasa su ultimo dianan hunto cu su Famia. 

** E señora aki tin un fe grandi den Dios, e señora a bin iglesia bin busca oracion, despues di un paar di siman e operacion cu tabata hopi peligroso a tuma lugar aki nan mes.

*** Y te awe e señora ta na bida y su edad a subi cu awor e ta den cas di hende grandi.

Ora nos asignacion caba aki na mundo Dios ta yama nos bini cas, ningun hende no por bay na lugar di otro ni tampoco tin cambio di fecha.

Pero pa tur esnan cu muri den Cristo, esnan cu a entrega nan bida na Cristo y a biba segun Su boluntad tin un speransa grandi di bida eterna segun Juan 3:16- 18.( 1 Thesalonisensenan 4:15-18).

**Pasobra palabra y promesa di Dios no ta cambia.

Pero pa esnan cu a rechasa e palabra, cu a ninga e oportunidad di arepenti, cu a haci bofon y cherche, ta para cla scirbi den Juan 3:36 cu nan lo no tin nada, ningun clase di speransa sino furia di Dios.

Dios ta misericordioso, e ta splica den Su palabra cu esnan cu keda para riba nan capricho, malicia, terco, cabes duro, inmoralidad y no kier cambia y tampoco no kier pordona. Nan ta montona furia di Dios pa nan mes ( Romanonan 2:5-8-9).

** Den Mateo 6:14-15 Dios ta splica cu si bo no pordona bo prohimo, Dios tampoco ta pordona bo, awor ta dificil pa bo drenta den Su reino si E no pordona bo. 

***Den Galationan 5:19-21 y 1 Corintionan 6:9-10 tambe Dios ta bolbe ripiti, cu esnan cu no arepenti, y acepta Cristo Hesus , y biba pa Señor lo no drenta e reino di Dios.

***** Awor cu bo ta na bida bo tin cu prepara pa bo encuentro cu Dios, pasobra ora bo muri ningun hende no por haci nada pa bo.(Lucas 16:19-31).