E por zona manera un cantica, of un poesia, pero esey ta e gran berdad, tur cos ta posibel pa esnan cu ta kere den Dios Tata todopoderoso, pasobra riba e mundo aki, hende tin libertad pa kere den diferente cos, aunke nan sa masha bon cu ningun di e cosnan ey por compara cu Dios Tata Todopoderso, pero nan ta gasta tempo, placa, y duna hasta adoracion, na idolatria, y pone fe den cosnan temporal.
Ta bo FE ta bo defensa.
Bo FE ta determina te na unda bo por yega.
No ta importa kico hende por bisa di bo, importante ta bo FE den Dios Todopoderoso.
FE ta algo sobrenatural cu por causa cambio den bo fisico (1 Samuel 1:11-19-20).
FE ta move man di Dios y man di Dios por move tur cos (Jeremias 32:27).
Tur hende por yena cu miedo y perde cabes den un famia,y hasta den un pais , pero si tin un hende cu FE y ta kere cu Dios por hacie , milagro lo sosode. (Isaias 37:14-20)
Un gran berdad si bo kier mira milager sosode cana cu hende cu tin FE ( Marco 5:37,40-42).
Salbacion ta bini pa medio di FE den Cristo Hesus.
Sin FE ta imposibel agrada Dios.
Tin hende ta manera e disipuloTomas (Juan 20:24-29) y hopi biaha si bo no fiha bo bista riba Dios tipo di hendenan asina , por trece tardansa den e proposito cu bo tin dilanti di Dios..
Tene bon cuenta cu semper FE ta funciona den boluntad di Dios, nunca FE por sali for di boluntad di Dios,semper e ta keda conforme Su creacion, no conforme na capricho di hende.
Dios nunca ta kita algo for di un hende pa duna otro hende, Dios ta duna bo locual originalmente ta pertenece na abo.
Bo FE ta e confiansa cu bo ta pone den Dios, y cu no ta laga nada move bo for di bo meta.(Filipensenan 3:12-14).
Fe ta mas poderoso cu conocemento di mundo, caminda ciencia y medicina ta bisa cu no por FE semper ta trece sorpresa.
Si bo tin Fe den Dios bo ta sali for cualquier tipo di adiccion, aunke hende ta bisa cu adiccion ta un malesa, pero tur cos ta posibel pa esun cu tin FE.
Igualmente si bo tin FE den Dios, alcohol y inmoralidad no por domina bo bida, bo Fe den Dios ta duna bo liberacion.
Tin hopi versiculo cu ta papia di FE, pa asina por convence hende den e poder y grandesa di Dios.
Nos mester proclama FE den Dios pasobra esey ta locual e Palabra di Dios ta siña nos, pa nos kere y permanece den dj’E.
E palabra di Dios ta bisa cu e señalnan aki lo sigi esnan cu ta kere, pero bo mester kere prome pa bo ricibi FE, pasobra bo FE mester ta den e yiu di Dios, manera (Marco 16:17-20) ta sinja nos.
Ora nos tin Fe den e Yiu di Dios nos por papia den Su nomber, pasobra e nomber di Cristo Hesus no ta cualquier organisacion/instituto humano cu nos ta usa su nomber pa grandesa y poder, pero e nomber di Hesus Cristo ta e nomber riba tur nomber, pa cual tur rudia mester dobla y tur lenga mester confesa cu Hesus Cristo ta Señor.
Como mayor nos mester tin FE den Dios Todopoderoso, pa asina nos yiunan tambe por mira grandesa di Dios den nos hogar.
