E boluntad di Dios pa nos bida, ta mas importante cu tur cos, nos no por permiti nada ni tampoco ningun hende saca nos for di e boluntad di Dios, pasobra e consecuencia di esey lo ta hopi serio pa nos.
Ora nos conoce e berdad y nos ta laga hende of situacion, saca nos for di boluntad di Dios, nos ta bira manera Adam kende tabata sa e berdad, pero a bini cu excuus pa Dios bisando “e muher cu Bo a duna mi pa ta hunto cu mi.( Genesis 3;12).
Nos tin di corda cu lo yega e dia cu nos cada un tin di duna cuenta di su mes na Dios .( Romanonan 14:12).
No gaña boso mes: Dios no ta laga haci bofon di dje’E: pasobra tur loke un hende sembra, esaki tambe e lo cosecha. Pasobra esun cu sembra pa su mes carni lo cosecha corupcion for di e carni, ma esun cu sembra pa e Spirito lo cosecha bida eterna for di e Spirito.( Galationan 6:7-8).
!E sistema di tira culpa riba hende, of bisa ta nan a mandami, of e decision a cay unamime, of nos a dicidi , of mayoria tabata pro, lo no conta riba e dia di huicio di Dios.
Pasobra kada mester duna cuenta pa nan mes , y e palabra di Dios ta bolbe recorda nos den Romanonan 2:5 lo siguiente: Ma pa motibo di bo capricho y bo curason cu no ta repenti , bo ta montona furia pa bo mes, den e dia di furia y revelacion di e huicio husto di Dios. Kende lo paga cada hende segun su obranan.
Hasta hende grandi ta parce cu nan ta lubida, e consecuencia di sali for di boluntad di Dios, awor na unda nos muchanan lo bay haña bon ehempel?
Dios no ta haci wega, den henter e Bijbel nos no por haña un caminda cu ta para scirbi cu Dios a haci un chansa.
Pero Su palabra ta recorda nos constantemente bisando:
Ay di esnan cu ta yama loke ta malo bon, y loke ta bon malo, loke ta scuridad, lus y loke ta lus,scuridad, loke ta marga dushi, y loke ta dushi marga.( Isaias 5:20).
Laga e nomber di Dios sea bendiciona pa semper y semper, pasobra sabiduria y poder ta pertenece na Dios. E ta esun cu ta cambia temponan y epocanan, E ta kita reynan y pone reynan. E ta duna sabiduria na sabionan y conocemento na hombernan di comprendemento. Ta E ta esun cu ta revela cosnan profundo y scondi; E sa kico tin den scuridad y e lus ta biba serca dj’E.(Daniel 2:21-22).
Akinan nos tur por realisa cu nada no ta pasa Dios voorbij, por ehempel e calor cu nos ta pasando den dje awor aki, Dios sa tur cos y pa ki motibo, mientras cu hende ta gasta tempo y placa, pensando cu nan por tin e solucion.
Tur desobedencia tin su consecuencia, esey ta locual mundo henter ta mira cu ta sosode entre Israel y Palestina.
Ora nos sa kico Dios ta bisa, y nos ta sigi pretende, pa complace hende, nos lo tin di carga e consecuencia, pasobra diabel no ta interesa den bienestar di ningun hende, e a bin solamente pa horta, pa mata y pa destrui, pesey nos mester ta alerta tur momento, pa no laga fanatismo, emocion, sensualidad y politica gaña nos, pasobra ningun hende por cambia berdad, principio y boluntad di Dios.
Laga nos yama Dios danki pa su inmenso misericordia.