Pastor Marcel Balootje: Tene bon cuenta: cu locual bo ta cumpra, bisti y adora

Maldad ta aumenta fuertemente riba e mundo aki, y no ta tur cos cu ta mustra bunita ta bon pa nos.

*No ta tur cos cu hende ofrece bo, bo mester ta cla pa corre cumpra y bisti na bo curpa, pasobra bo por bisti cosnan cu a wordo sacrifica na idolonan, y tambe articulonan di santeria y bruheria sin bo ta na altura.

Pero tin hende cu sa masha bon, cu e articulo ey a wordo pasa den man di maldad, y nan ta cumpre keriendo, cu esey ta bay duna cierto suerte of poder, of hasta haci nan atractivo pa otro hende.

Lamentablemente tin hopi hende ta bira malo, of actitud ta cambia, of relacion ta kibra enbes di drecha pasobra nan tin cos bisti cu no ta bon pa nan bida, nan cas y nan famia.

Y hopi di e cosnan ey no ta bay bon cu muchanan, tene cuenta cu diabel ta un mentiroso, y diabel pa haci tur cos pa destrui bida di hende, of pa tene hende mara na dje.

Dia pa dia e cantidad di hende cu ta kere den armband , y cadena di tur tipo mara na pia, y otro cosnan, cual nan ta kere cu ta yuda, ta aumenta barbaramente, y si bo puntra ta kico e cos ey ta bo ta tende cu ta cos na moda, y cu mi a guste, pero tene cuenta cu no ta tur locual bo a a gusta, ta spiritualmente bon pa bo bida.

Esaki no ta un wega, pero cos cu nos tin di tene cuenta cune, pasobra e Palabra di Dios ta bisa pa nos huy for di idolatria, y cu nos curpa ta tempel di Dios y e spirito di Dios ta biba den dje.

* Dios no ta obliga ningun hende cana cu armband, of kraal mara na pia pa identifica cu bo ta yiu di Dios. 

* Dios su palabra ta bisa cu sin fe ta imposibel agrada Dios, tambe Cristo Hesus ta bisa nos, cu tur cos ta posibel pa esun cu ta kere. Pasobra pa Dios nada ta imposibel.

* E no a bisa cu a medio di armband, renchi,medayon, kraal na pia, lo bo aumenta poder di Dios den bo bida, e poder di Dios ta aumenta den bo bida simplemente pa medio entrega bo bida na Cristo Hesus, Oracion Fe y Temor di Dios.

Temor di Dios ta aumenta confiansa den Dios, y bo confiansa den Dios,y gracia di Dios, lo duna bo fabor tanto cu Dios y cu hende.

Dios a haci nos liber, pesey no bay bek na cosnan di idolatria, bruheria y santeria, buscando contacto cu mundo di scuridad, pa medio di articulonan cu nos ta bisti.

Tur e cosnan aki ta haci hende sabi bira bobo, poniendo nan confiansa den articulo, en bes di pone confiansa den Dios Tata Todopoderso.

Di berdad cu tin hopi hende cu cosnan bisti cu ta atrae mal influencia, cu ta destrui karakter di hende, pasobra nan confiansa ta mas den bagamunderia cu den Dios.

E enemigo ta busca tur manera pa tin dominio riba hende, den cosnan chiki, y den cosnan grandi, tene cuenta cu si diabel por claba un clabo den bo cas, e ta cohe dominio den bo hogar.

* Cuanto hende su matrimonio, no a wordo kibra pa motibo di idolatria?

*** Cuanto mucha no ta den rebeldia pa motibo di cosnan cu nan mayornan a pone nan bisti.

Ta tempo pa hende realisa, cu ta solamente Dios merece tur Honor Y Gloria.