Maske con studia un hende ta, maske con profesional e por ta sinti su mes, maske cuanto fanatico e por tin, maske rikesa ta e unico cos cu e ta corda riba dje, toch e mester di displina den su bida.
E mihor disiplina ta esun cu ta bini di ariba, esun cu ta bini di Dios, pasobra hende ta prepara su caminda , pero ta Dios ta dirigi nos pasonan.
Un bon deportista mester di un entrenador, den tur locual hende ta haci semper mester tin un mentor, pa guia positivamente, edificando e persona tur dia.
Pesey den nos bida diario nos mester tin contacto cu nos Señor Hesus Cristo, cual ta nos Maestro, esun cu nos tin di imita, esun cu nos tin di obedece, pa asina nos por siña for di dj’E.( Juan 10:14-16).
Den nos bida displina ta hopi importante, pasobra nos mester lanta na ora mainta, nos mester presenta na trabao na tempo, nos mester mantene reglanan di hygiena, reglanan den trafico, reglanan na trabao, tur esey ta parti di disiplina den nos bida, sin disiplina bida lo ta hopi bruha.
Si como mayor bo no instrui bo yiu riba e bon caminda, bo no ta displina bo yiu, esey ta nifica cu bo no stima bo yiu. Pasobra e palabra di Dios ta bisa cu Señor ta disiplina esnan cu e ta stima.
Job 5:17 ta para scirbi: Bendiciona ta e homber cu Dios ta reprende, pesey no desprecia e disiplina di e Todopoderoso.
Sin disiplina den bida, rebeldia ta drenta y pone nos integridad na peliger, pasobra nos mester somete na Dios.Disiplina semper ta contribui na crecemento sano y puro, pero tin biaha e ta doloroso.
Un persona cu no tin disiplina ni tampoco dominio propio, ta hiba un bida yen di stress y preocupacion, pasobra su cabes ta duro y e no kier obedece..
Un persona cu no ta displina lo trece hopi problema den un bida matrimonial, pasobra na prome lugar un hende sin disiplina no ta respeta, e no tin palabra, y mas cu tur cos , locual e no a ricibi serca su mayornan e no por ofrece na su pareha.
Pesey e palabtra di Dios ta bisa nos como mayor pa lanta nos yuinan den e disiplina y amor di Señor, pasobra una vez un palo ta dobla ta bira dificil pa pone crece recht.
Mas disiplina nos ta mas responsabel nos ta bira, pasobra bo no por pone responsabilidad den man di hende cu no ta disiplina, pasobra hopi biaha hende ta pensa cu pa motibo di nan talento y fama , tur cos ta wordo permiti, pero danki na Dios, pasobra serca Dios, titulo no ta conta pasobra Dios no ta haci distincion di persona.
Serca Dios, nos tur por yega y ricibi sabiduria di dje generosamente y sin reproche.
Dios kier pa nos sa cu ora nos ta pasa den un prueba (disiplina) den cualkier area di nos bida , no ta pa kibra nos, pero pa nos siña persevera , pasobra perservencia ta produci perfeccion.(Santiago 1:2-4).
Mescos cu displina ta produci profesionalismo, obedencia na Dios ta produci grandesa.
Abraham su obedencia a produci grandesa pe e a wordo yama tata di nacionnan.
Noe su obedencia a dune gracia den bista di Dios.
Hose su obedencia, displina, y fieldad dilanti di Dios a pone cu Farao a nombre gobernador di Egypto
Disiplina y Respet semper lo habri porta pa tur hende.