Nos ta bibando den tempo trabahoso , caminda malo ta wordo apoya como bon. Inmoralidad ta wordo transmiti como informacion y enseñansa, Perversidad ta wordo yama moda. Impuresa ta wordo disfrasa den un forma di biba.
Tur esakinan ta forma parti di e nubia scur cual diabel kier cubri mente di esnan cu no kier tende y somete nan bida completamente na Cristo Hesus.
Ta tempo pa predica e evangelio cu e maximo claridad di expresion posibel, pasobra nos Señor nunca a husa palabra bunita pa convence hende, pero Hesus a bisa tur cos manera nan ta, y ta keda na e persona si e kier tende of no.
E tempo cu ta falta pa e binida di Cristo ta hopi cortico, y no ta tempo pa yaya hende mas pero ta tempo pa bisa e berdad, pasobra lo bo sa e berdad y berdad lo haci bo liber.
Hopi biaha bo ta tende mayornan bisa cu nan no por forsa nan yuinan pa bay cas di Dios , sea misa, iglesia, tempel etc.
Pero e diabel si ta rancanan bay caya cu ne.
Hinca nan den paranda y buracheria.
Usando tur clase di droga.
Bruha nan mente pa nan bende nan curpa.
Domina na bida cu habito robes asina cu nan ta bira sin identidad, y sali completamente for di locual ta e boluntad di Dios pa nan bida.
Hincanan den gang y asina nan ta bira criminal tempran den nan bida.
Mientras cu nos como mayor kier bay suave, pa evita discucion, e enemigo ta hala nos yuinan bay cune.
Hesus papiando den Mateo 18:5-6 ta bisa : Y ken cu ricibi un mucha asina den Mi nomber, ta Ami e ta ricibi.Ma ken cu haci un di e chikitonan aki , cu ta kere den mi trompica, ta mihor pe cu un piedra di molina pisa wordo cologa na su garganta y cu e wordo hoga den profundidad di laman.
Aki nan tur hende mester realisa, kico ta e consequencia pa esnan cu pone piedra di trompica den caminda di muchanan, Pasobra esaki no ta opinion di hende, pero ta palabra cu Cristo Hesus mes a bisa, y esun cu ta rechasa palabra di Dios, Dios tambe lo rechase.
E a cohe un mucha y pone para mey mey di nan, y ora cu E a tume den su brasa, E a bisa nan: Ken cu ricibi un mucha manera esaki den Mi nomber ta Ami e a ricibi, y ken cu ricibi Mi, no ta Ami e a ricibi, sino esun cu a manda Mi.( Marco 9:36-37),
Yuinan ta herencia di Señor, e fruta di barica ta un recompensa.( Salmo 127:3).
Mira pa boso no despresia un di e chikitonan aki,pasobra Mi ta bisa boso cu nan angelnan den cielo, continuamente ta contempla cara di Mi Tata cu ta den cielo. ( Mateo 18:10).
Ta dolor pa mira con hobennan awendia ta bay den caminda robes, cana cu arma, comete crimen, y hasta kita nan propio bida.
Ta tempo pa nos no wak mas ken ta ken , tampoco yiu di ken, pero cada mucha ta importante pa Dios.
Ta un tristesa ora nos tende hende papia y bisa con droga mester wordo legalisa, y nan sa masha bon cu e victima mas grandi lo ta nos muchanan.
Ta tur sorto di bagamunderia e enemigo ta purba riba nos muchanan, pero nos tin di corda cu nos como mayor mester ta responsabel y guia nos yuinan den e caminda di berdad y bida, caul ta e caminda di nos Señor Hesus Cristo.
Dios yuda nos,
