Pastor Marcel Balootje: Ta tempo pa consagra nos mes na senjor, su binida ta serca

Hende kier biba pa nan cuenta, respet a wordo pone un banda, mentira ta wordo acepta manera regla di bida, y si bo no kier kere, apoya of participa den mentira, bo ta wordo tuma na malo, pasobra ta tempo cu hende ta yama scuridad lus y loke ta lus scuridad.( Isaias 5: 20).

Señor su palabra ta sigi adverti nos bisando den Isaias 52:11 : Sali, sali for di nan, no mishi cu nada impuro,sali for di mey mey di dje , purifica boso mes, boso cu ta carga e articulonan di uso di Señor.

Romanonan 12:1+2 ta para scirbi: Pesey mi ta roga boso, rumannan pa medio di e misercordianan di Dios, pa presenta boso curpanan como sacrificionan bibo y santo, aceptabel pa Dios,cual ta boso sirbishi spiritual di adoracion. Y no sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.

Consagracion ta un proceso cu mester tuma lugar den nos bida, si di berdad, nos kier mira e cara di Dios, pasobra Dios conoce esnan cu ta fiel na su Palabra, y su palabra ta bisa; Aspira pa tin pas cu tur hende, y santificacion, sin cual ningun hende lo no mira Señor.( Hebreonan 12:14).

Nos tur ta mirando cu esey no ta e ruta di e mundo aki, enbes di hende busca santidad di Dios, barbaridad ta aumentando, inmoralidad ta creciendo, violencia a tapa wowo hende y mentira ta birando un arte pa mantene hende den scuridad.

Pesey si un hende ta den Cristo,ta un criatura nobo e ta, e cosnan bieu a pasa caba, ata tur cos a bira nobo.Awor tur e cosnan aki ta bin di Dios, kende a reconcilia nos cu Su mes, door di Cristo y a duna nos e ministerio di reconciliacion.( 2 Corintionan 5:17-18).

E sirbido di Señor no mester ta pleitado, ma cariñoso cu tur hende,cu capacidad pa siña, cu pasenshi ora e wordo trata inhustamente. Cu ta coregi cu suavidad esnan cu ta den oposicion, pa kisas Dios duna nan repentimento, cu ta hiba na conocemento di e berdad. Y nan bini na sano huicio y scapa for di e trampa di diabel, den cual e a tene nan preso pa haci su boluntad.( 2Timoteo 2:24-25-26).

Santidad ta trece intimidad cu Dios y forsa spiritual ( Salmo 15).

Santidad ta hiba nos na e proposito di Dios pa nos bida.( 2 Timoteo 2:20-26).

Santidad ta pone hende rond di nos glorifica Dios. ( 1 Pedro 2:9-12).

Santidad ta hiba na pas cu Dios. ( 2 Pedro 3:9-10).

Santidad ta pone nos agrada Dios y produci fruta. ( Efesionan 5:1-17).

Awendia spiertamento y coreccion ta wordo manipula como husgamento y discriminacion, pa asina hende wordo engaña y permanece den pica, pasobra e enemigo di nos alma a modernisa su trampanan pa hende permanece den scuridad y idolatria y conociendo e berdad toch no kier biba den e santidad y boluntad di Dios.

Bendiciona ta e hende, cu no ta cana den conseho di malbadonan, ni ta sinta riba stoel di bofonadornan. Ma su delisia ta den e ley di Señor, y den Su ley e ta medita di dia y anochi

Laga nos no lubida esaki,pasobra e palabra di Dios ta bisa:

Ma pa motibo di bo capricho, y bo curason cu no kier arepenti bo ta montona furia pa bo mes, den e dia di furia y revelacion di e huicio hustu di Dios.( Romanonan 2:5). 

Arepenti y entrega bo mes..