Cada ken cu tin wowo ta mira locual cu ta sosode, y cada ken cu tin horea ta tende locual cu ta sosode.
Diabel ta hambra tras di nos muchanan, tras di nos hubentud, e ta buscando caida pa e muchanan di awor y pa e futuro generacion.
Uso di droga y alcohol a sali for di man bao di hubentud, nos hubentud ta consumi hopi alcohol y droga.
Canamento cu arma di candela a sali for di control, y mayoria biaha cu un arma wordo descubri ta un hoben ta su doño.
Hincamento a para bira un arte, tur caminda hobennan cana cu arma blanco, y a bira tempo pa pone metal detector na porta di cada scol.
Antes ora bo tende tin un problema bo por a bisa, cu mucha muher no ta meti den e asunto, pero awendia esey a cambia por completo, pasobra tin mucha muher cu mas curashi pa haci malo cu e mucha homber.
Mirando tur esaki nos tin cu compronde cu esaki ta bay den direccion di destruccion di nos hubentud.
Y tin instamcia cu a avisa cu nos problema social ta grandi y cu no tin suficiente man pa atende.
Awor bo no ta tende nada:
Tocante di e caranan hoben nobo cu tin den caya, como adicto?
Bo no ta tende cu tin hobennan cu ta biba riba caya?
Bo no ta tende cuanto mucha a stop di bay scol?
Ni tampoco bo no ta tende cu criminalidad a aumenta barbaro bao di hubentud?
Y cu por ehempel awor a bira na moda cu gang di hoben ta cana drenta minimarket anochi pa horta?
Y cu e cantidad di hoben cu ta cay sera ta aumentando?
Y cu nos tin miedo di papia tocante suicidio?
Ora ta trata di problema social, no ta bon pa nos compara nos mes cu otro isla of pais, pero ta tempo pa nos tuma e situacion, caminda norma y balor ta bayendo perdi, y inmoralidad y scuridad ta avansa , hopi na serio.
E prome caminda cu nos como mayor mester aserca pa yudansa, ta e trono di Dios Altisimo, pasobra tur hende por nota cu nos lucha no ta contra carni y sanger, pero contra esun cu ta bini pa horta, mata y destrui.( Juan 10:10).
Como mayor nos no por para keto y laga e enemigo haci locual cu e kier cu nos yuinan, ta tempo pa nos halsa bos den oracion, na Dios todopoderoso, pasobra Dios si ta contesta oracion, y su ayudo semper ta yega na tempo.
Nos ta yama como mayor pa lanta nos yuinan den obedencia y disiplina di Señor,
Nos mester hiba nos yuinan cas di Dios, pasobra si nos no hacie e enemigo ta gana bentaha riba nos yuinan.
Nos ta bibando den tempo trabahoso, caminda respet ta cabando, violencia ta aumenta, inmoralidad ta drenta mundialmente serca hobennan como informacion na scol, tanto via di video, buki of revista y serca maestro of maestra cu ta pone nan mes como piedra di trompica pa daña locual Dios ta stima.
Respaldo di hende responsabel a bira scars, mayoria hende den un posicion di liderazgo ta busca fama pa nan mes, y ta complace cu tur cos y ta lubida riba Dios.
Esaki ta e tempo corecto pa nos busca cara di Dios, pa nos mes y pa nos yuinan,pasobra e situacion ta hopi alarmante , ta tempo pa nos uni y haci oracion pa nos yuinan.
Tirando boso preocupacion riba dj’E pasobra E lo percura pa boso.( 1 Pedro 5:7)
