Pastor Marcel Balootje: Ta imposibel tuma un funcion y no carga responsabilidad

Den e mundo moderno , yena cu ciencia , techonologia, maldad y inmoralidad , nos mester siña nos yuinan for di chiki pa carga responsabilidad pa asina nan por ta berdadero lidernan di mañan cu Dios kier, pa nan ta homber y muher cu ta haci y ta cumpli cu nan palabra y no crece bira hende di hopi palabra, pero poco hecho.( Santiago 1:22-23).

Encargo den cas, cu awe ta parce chikito, tin un efecto grandi riba nan bida, pasobra nan ta crece responsabel, pero ehempel encargo pa cria e bestia di cas, sea cacho, galiña,cabrito, carne ta haci muchanan responsabel y ta pone nan lanta cu amor pa bestia, y e amor tambe nan lo tin pa hende ,y nan lo ta ocupa den cosnan positivo constantemente.

Responsablidad pa tene cas y cura limpi y na ordo, for di chiki, ta haci muchanan embahador di cas,y no manera hopi ta hinca den cabes di muchanan awendia, cu si bo ta haci trabao di cas, bo ta esclavo of cachifa, of esey ta abuso di mayor..

Pesey bo ta haña mucha rebelde cu no por haci nada, of no kier haci, pasobra pensamento contrali y asocial a wordo hinca den nan cabes cual ta pone nan rechasa di haci trabao di cas y kere cu esey ta pa mama so, y nan por drumi henter dia cu telefon den man of sinta henter dia tras di laptop of dilanti di tv.

Tur responsabilidad duna na mucha for chiki, ta un grado di un bon cuidano mayan cu Dios kier, un bon esposa, of esposo y naturalmente un mayor responsabel.

Cana riba caya, pariba , pabao den grupo, ta activa mal pensamento, bagamunderia, violencia, y hasta inmoralidad, y resultado na scol no ta cos di gaba, of ta dropout.

Awendia hopi hende ta enamora di titulo, pero poco ta corda riba nan responsabilidad, pasobra ta hopi great di bisa cu mi ta tata, of mi ta mama, pero di berdad mi ta cumpli cu e responsabilidad?

Ta hopi importante lanta nos yuinan cu berdad, pa nan papia berdad,cu un consenshi limpi, aparta for for di mentira y palabra malo, sushi y dañino for di nan boca.

Pasobra ta para scirbi: Esun cu ta sconde su picanan lo no prospera, ma esun cu confesa y laga nan lo haña misericordia ( Proverbionan 28:13).

Pasobra si un hende ta pensa cu e ta algo, siendo e no ta nada, e ta gaña su mes. ( Galationan 6:4).

Nos mester lanta nos yuinan cu e conocemento cu no tin nada scondi dilanti di Dios, cu dilanti di Dios tur cos ta habri, y cu tur hende mester duna cuenta na Dios pa nan hechonan.

E grado di mentira den mundo a aumenta asina tanto cu e ta corumpi, laba,y putri mente di muchanan, treciendo pensamento completamente contrali di e Palabra di Dios, cual ta comberti e mucha den un persona cu ta rechasa Dios, y ta habri caminda den su bida pa scuridad por reina, orguyo por briya, esclavitud na inmoralidad cu ta termina den amargura,pasobra si no tin arepentimento, lo no tin entrega na Cristo Hesus, y manera ta para scirbi den Juan 3:16-18 un bida asina lo bay perdi.

Responsabilidad, semper a bini di Dios, Iresponsabel ta strategia diabolico, cu por haci cu bo ta perhudica bo mes y otro nan. 

Laga nos yuda tur hoben pa nan ta persona nan di respet, cu ta obediente, tanto na cas como riba caya.

Pa asina integridad di Dios por goberna nan bida, y nan karakter lo ta firme.