Envidia ta negativo, carnal, terenal,natural ,diabolico, vengativo y destructivo, envidia ta daña curason di hende y ta pone hende trompica, envidia ta pone hende cana cu mascarada, manteniendo dos cara, awe hende ta bon cu bo, pero asina nan mira bo cuminsa crece, ya bo no ta bon mas, pasobra envidia ta wak solamente su propio interes y no esun di su prohimo.
For di unda envidia ta bini, awel e ta bini for di satanas cu for di tempo e tabata den cielo como angel lucifer e a cuminsa envidia Dios, pesey inhusticia a wordo haña den dje .( Ezekiel 28:15-19).
Y ta pesey awor aki riba mundo un di cosnan di mas teribel cu por ataka nos bida, cas, y famia ta envidia.
Envidia ta hasta causa guera,y hopi destruccion.
Pa motibo di envidia Cain a mata Abel, Hose su rumannan a bende, Saul a persigi David etc.
Proverbionan 14:30 ta bisa: Un curason trankil ta bida pa e curpa,ma envidia ta putrimento di weso.
Aviso pa nos hubentud; No envidia ningun malbado , ni desea pa ta hunto cu nan. aparta for di hende envidioso, violento, sin consenshi.
Laga nos comporta nos mes decentemente manera den dia,no den parandiamento,y den buracheria,no den imoralidad sexual y sensualidad,no den pleito y envidia.(Romanonan 13:13-14).
Hende envidioso kier stroba otro pa bay dilanti.
Nan kier pone hende trompica,nan kier controla bida di otro, door di halsa nan mes y rebaha otro su personalidad.
Hende envidioso, no por continua cu un trabao cu otro a cuminsa, hende envidioso no tin curason pa restaura, nan no tin amor, solamente un boca grandi pa kibra y descurasha otro,
Hende envidioso no por celebra victoria di otro y ta pesey nan no tin victoria, pasobra nan curason no ta sano, tin hende ta asina envidioso cu dia nan sa cu nan colega tin cu haña su promocion, nan ta meldziek.
Envidia no ta respeta, tur caminda e ta penetra, pa asina kibra relacion di hende cu otro, envidia ta drenta famia, cas , politica , y hasta matrimonio y pone pareha contra otro y di un manera facil trece separacion.
Envidia ta haci hende rebelde y asina nan ta perde comunicacion cu Dios, y cay den idolatria.
Pero den Cristo Hesus tin cura pa envidia:
Lucas 9:23 ta para scirbi: Si un hende kier bini Mi tras, laga e ninga su mes y hisa su cruz tur dia y sigi Mi . Esaki ta nifica cu si un hende tin envidia y e yega serca Señor y arepenti, Señor mes lo libre.
Laga boso karakter ta liber di amor pa placa y sea contento cu loke boso tin , pasobra E mes a bisa
Nunca lo Mi bandona bo y nunca lo Mi laga bo desampara.( Hebreonan 13:5).
Ta pa libertad Cristo Hesus a haci nos liber, pesey keda para firme y no sea someti atrobe na un yugo di sclavitud.( Galationan 5:1).
Ningun caminda no tin remedi obtenibel contra Envidia, pasobra e ta un pica , cu ta solamente door di acepta cu bo ta envidioso, y busca yudansa den Cristo Hesus bo por wordo libera.. Palabra di Dios ta bisa esun cu ta sconde su pica lo no prospera.
Laga nos wak rond y haci hopi oracion, y wak cuanto cos no ta bay bon, cuanto cos ta para, y cuanto cos ta parce manera no tin solucion, cuanto famia kibra pa motibo di envidia, pasobra hende envidioso ta prefera di laga tur cos bay perdi, y no acepta conseho ni ayudo.
No cunsumi pa motibo di malbadonan, ni sea envidioso di e hacidornan di inikidad.( Salmo 37:1)
