Ora un cunukero planta un simia, e no tin control mas riba dje, solamente e tin confiansa cu Dios lo permiti e simia nace, crece y duna fruta.
Ora un mama ta na estado di un yiu , e no tin control di locual tin den su barica, solamente e ta confia Dios ,pa dune un baby fisicamente y mentalmente bon.
Ora nos ta viaha nos ta cumpra ticket y subi avion , cu confiansa cu Dios lo cubri nos viahe, pasobra e piloto por ta profesional, pero e avion ta den man di Dios, especialmente ora e vuleo ta largo.
Nos ta drenta sala di operacion cu e mihor dokter y e mihor profesor , pero nos confiansa ta den Dios pa E pone su man y e operacion lo ta un exito.
Lo Bo warda den pas perfecto, esun cu su pensamento ta permanece den Bo, pasobra e ta confia den Bo.
Confia den Señor, pa semper pasobra den Dios e Señor nos tin un Baranca eterno.( Isaias 26:3-4).
Ciencia y technologia por aumenta y hopi ya a cuminsa pensa cu nan tin mas poder cu Dios, pero nos mester mantene nos fe y confiansa den Dios, pa nos ricibi locual Dios tin pa nos.
Dios a duna nos su Yiu Cristo Hesus como nos unico y suficiente Salbador, y solamente den Su nomber lamnan ta lanta y cana, ciegonan ta mira, y sordo ta tende y tur sorto di enfermedad ta wordo sana.
Maldad , scuridad, y amor pa placa, ta pone cu hende ta perde confiansa den Dios, y bira haragan, y asina cay den un buraco cu ta solamente Dios, por saca nan, pasobra e enemigo tey pa horta mata y destrui, pero solamente Dios ta libra hende.
Ta hopi tipo di malicia tin awendia cu ta yama nan mes sabiduria caminda tur cos ta wordo haci, pero masha poco e nomber di Dios ta wordo menciona.
Den tur celebracion , nos mester corda riba Dios pasobra E ta e motibo principal di nos celebracion, pasobra si no tabata pa Dios nos no por celebra nada
E respet pa Dios, ta produci confiansa y fe den Dios, y asina nos ta pone Dios na prome lugar den nos bida.
Dios no ta algo priva, ni tampoco nunca lo bira algo priva,nos bida spiritual no por ta algo priva , pasobra solamente hende cu ta haci algo malo y inmoral ta hacie scondi, pero ora nos ta alaba Dios nos ta hacie abiertamente, pasobra aki nan nos ta trata cu e Todopoderoso.
Ta miedo di ken nos tin cu nos no por expresa nos confiansa den Dios, kende ta nos refugio y nos fortaleza.
Ken cu nenga e Yiu no tin e Tata,esun cu confesa e Yiu tin e Tata tambe.(1Juan 2;23).
Nos kier bay dilanti y nos kier prospera, nos kier mira cosnan grandi sosode, pero nos no kier confia Dios riba tur cos, y reconoce cu E ta Dios y no tin ningun otro pa compara cune.
Ta cuanto prueba mas nos mester di Su grandesa y su Poder:,
E ta mesun Dios cu a habri Laman Corra
E mesun Dios cu a destrui Sodoma y Gommora,
E mesun Dios cu a lanta Lazaro for di morto,
E mesun Dios cu a habri wowo di Bartimeo.
E mesun Dios cu a cambia bida di Pablo,
E mesun Dios cu a restaura Pedro y pone den ministerio.
Nos tin suficiente prueba y testimonio , cu ta habri nos wowo pa asina nos mira cu pa Dios nada ta imposibel.
