Pasobra Dios a stima e mundo asina tanto cu E a duna Su Yiu unigenito, pa ken cu kere den dj’E no bay perdi ,ma tin bida eterno.( Juan 3;16).
Esun cu kere den dj’E no ta condena, esun cu no ta kere ta condena caba, pasobra e no ta kere den e Yiu unigenito di Dios.(Juan 3;18).
Esaki ta e condenacion, cu e lus a bini den mundo y hende a stima e scuridad, mas cu e lus, pasobra nan hechonan tabata malo.( Juan 3:19).
Pasobra esun cu ta haci maldad ta odia e lus, y no ta bin na e lus, pa su hechonan no wordo exponi .(Juan 3;20).
E situacion ta comprendibel pa tur hende, esun cu kere lo ta salba, esun cu no kere lo bay perdi, cu ta nifica cu e lo no hereda cielo, y una bes un hende no hereda cielo, anto e ora ey su destinacion lo ta fierno, pasobra e no a kere den e Yiu unigenito di Dios.
E tempo pa haci wega cu pica, ta cabando, e tempo pa nos ta friuw awe, y cayente mayan cu Dios kier, ta hinca nos den un situacion hopi dificil, pasobra ningun hende sa e momento cu Cristo Hesus lo bin busca su pueblo.
Y awor tur cos ta demostra cu Dios a traha e caminda pa nos yega serca dj’E, cual caminda ta Cristo Hesus, pasobra Cristo Hesus ta e caminda e berdad y e bida, pero ta parce cu hopi hende hopi kier e camindad di paranda, inmoralidad, scuridad, idolatria y bruheria, cual ta hiba hende na perdicion.
Y hopi no sa e beneficionan cu nos tin den Cristo Hesus;
Bendiciona sea e Dios y Tata di nos Señor Hesus Cristo .
Kende a bendiciona nos cu tur bendicion spiritual, den e lugar nan celestial den Cristo , mescos cu E a scohe nos mes den dj’E, prome cu fundacion di mundo, pa nos por ta santo y sin culpa dilanti di dj’E.
Den amor E a predestina nos pa wordo adopta como Su yuinan pa medio di Hesus Cristo , segun e bon intencion di su boluntad.
Pa e alabansa di e gloria di Su gracia, cu e a duna nos na abundancia den Esun stima.
Den dj’E nos tin redencion pa medio di Su sanger, e pordon di picanan segun rikesa di su gracia, Cu e E a derama na abundancia riba nos, den tur sabiduria y prudencia. ( Efesionan 1; 1-8).
E beneficionan aki ta alcansabel pa tur esnan cu kere den Su Yiu Cristo Hesus, pasobra Dios a stima mundo y e no a rechasa ningun hende, y ningun hende no por stroba un otro di drenta cielo, ta locual e hende mes scohe ta dicidi si e ta drenta si of no.
A yega tempo pa tur hende mira e claridad den e asunto, pasobra no tin nada mas laf ora hende ta gaña nan mes.
No gaña boso mes, Dios no ta laga hende haci bofon di dj’E , pasobra loke un hende sembra esaki tambe e lo cosecha.
Pasobra e esun cu sembra den su mes carni lo cosecha corupcion for di e carni, ma esun cu sembra pa e Spirito, lo cosecha bida eterna for di e Spirito.(Galationan 6:7+8)
Pakico laga diabel gaña nos y laga nos bida corre peliger.
Ta momento pa nos tuma e decision di entrega nos bida na Cristo Hesus, y asina nos tur por bisa: Ami y mi cas ta sirbi Señor.