Tur señal ta demostra nos , cu e binida di nos Señor Cristo Hesus ta serca, nos ta bibando den un tempo caminda maldad y rebeldia ta avansa cada dia riba e mundo aki.
Hende ta pensando solamente riba nan so, riba nan placa, riba nan posicion, practicando un humildad falso, hende ta biba leu for di Dios, inmoralidad ta birando legal , y no papia mes di hamber y miseria.
Na e momento cu Señor a avisa Noe cu Señor tabata bay pone un fin na mundo cu diluvio (awacero), pasobra tur locual tabata sosode riba e mundo aki tabata maldad so, Noe no a para keto, pero pa 120 aña e predica e palabra di Dios avisando tur hende cu e fin ta serca, pero manera ta pasando awor aki, nan no a tende, nan a haci bofon, pero ora awacero a cuminsa cay, tur esnan cu no tabata kere a corre bay serca Noe pa drenta e Arca, pero Señor a sera e porta ( Genesis 7:6).
Ta mescos cu den e dianan di Sodoma y Gommora, den cual hende a rebeldia contra Dios, den tur clase di maldad, bijbel ta bisa cu e hendenan di Sodoma y Gommora tabata malbado ( Genesis 13:13).
Laga nos tuma nota,con frialdad pa sirbi Dios a aumenta riba mundo, hendenan tin tempo pa tur cos, pero asina yega e momento pa sirbi Dios, tur cos ta bira dificil, no tin tempo pa Dios.
Hende su bista ta riba placa, material, technologia, idolatria y mas cu tur cos halsa nan mes, y orguyo y arogancia ta sali na cla cada dia mas.
Tira un bista riba e mundo y mira cu tin gruponan cu ta totalmente contra e palabra di Dios, hendenan cu no ta respeta Dios, tampoco no kier biba segun e principionan y boluntad di Dios, pero ta demostra cu hecho y palabra cu nan ta contra Dios.Y nos ta mira con maldad y inmoralidad ta wordo apoya, y asina hinca e ser humano mas den scuridad.
Pero ta nos deber,di sigi avisa e mundo completo di e binida di Senjor, pasobra ta para scirbi den Ezequiel 3:17+18:
Yiu di hende , Mi a haci bo guardia di e cas di Israel:
Ki ora cu bo tende un palabra for di Mi boca. Spierta nan pa Mi.
Ora Mi bisa e malbado,lo bo muri sigur, y abo no spierte, ni papia pa spierta e malbado pa laga su mal caminda pa e biba, e malbado ey lo muri den su inikidad, ma su sanger lo Mi exigi for di bo man.
Ma si bo spierta e malbado y e no bira for di su maldad, ni for di su mal caminda, e lo muri den su inikidad, ma abo a libra bo mes.
Awor Dios a stima mundo asina tanto,cu E a manda Su Yiu unigenito, pa ken cu kere den dj’E no bay perdi ma tin bida eterna.
Esun cu kere lo ta salba, ma esun cu no kere lo ta condena, pasobra e no a kere den e Yiu unigenito di Dios.( Juan 3:16-17-18).
Pesey sabiendo e berdad di Dios, nos tin cu haci mas esfuerso, pa anuncia na tur hende e berdad, pasobra e tempo di cosecha di Señor ta serca. E dia ni e ora ningun hende no sa,pero e movecion di e mundu , y e aumento di maldad y inmoralidad ta demostra esey hopi cla.
Esun cu ta kere den e Yiu tin bida eterno, ma esun cu no obedece e Yiu lo no mira bida, ma e furia di Dios lo keda riba dje.
