Hopi biaha, nos ta wak for di unda un conseho ta bini, of ken ta papia, of si e persona tin hopi scol, of e ta di mesun creencia cu nos, y hasta tin distincion for di unda e persona ta bini, pa nos acepta un palabra for di su boca especialmente, si e trece un palabra di coreccion.
Ora Dios kier papia cu nos E ta usa e persona cu e kier, esun cu ta disponibel, y hopi biaha por ta un persona cu nos no gusta, pasobra Dios no ta depende di nos, pero nos ta depende di Dios.
Cuanto biaha bon conseho ta keda warda, pasobra e no ta bini for di mesun linja politico, e ta wordo sera den lachi pa hopi aña, aunke e pueblo wordo perhudica.
Mescos cu den bida di tur dia, hopi biaha nos no kier tende, pasobra e persona cu ta conseha no ta nos hende, of e ta un mucha, y nos orguyo y arogancia no ta laga nos acepta e berdad cu ta sali for di su boca.
Beibel ta conta nos con un mucha a scapa bida di un persona rico, grandi y cu fama, pero e mucha tabata un catibo.
Awor Naaman, capitan di ehercito di rey di Siria, tabata un gran homber den bista di su shon, y masha respeta , pasobra pa medio di dje, Señor a duna victoria na Siria,Tambe e homber tabata un guerero balente, ma e tabata un leproso.
Awor e Sirionan a sali den trupanan, y a cohe y a cohe un mucha muhe chikito di tera di Israel como catibo, y e tabata sirbi Naaman su esposa.
Y e mucha a bisa Naaman su esposa, mara mi shon Naaman tabata serca e profeta cu ta den Samaria. E ora ey lo e lo a cure di su lepra.
Asina simpel Dios a permiti e conseho yega. For di un catibo pa su shon, y e shon a tende.
Y e a haci tur locual ta posibel pa e yega na e lugar pa e hanja su sanacion.
Nos tur sa cuanto cos a pasa con orguyoso y cabesura Naaman tabata , pero na final e a obedece e profeta y a wordo sana.( 2 Reynan 5:1-14).
Ora nos ta biba hunto como famia, nos mester scucha di otro,mescos cu un mucha tin di scucha di su mayornan, e mayornan tambe mester pone atencion ora e yuinan ta papia, y hasta tuma nan conseho pasobra e yuinan cu Dios a duna bo ta pa bendicion, pa consuelo, pa ayudo.
Ora un mucha kier papia, pone atencion y scucha, pasobra nunca bo no sa si Dios kier usa e mucha ey pa spierta abo cu ta hende grandi, y bo mester tuma e curashi di puntra bo yiu aunke e ta chikito kico e ta opina, pasobra muchanan tambe ta parti di famia.
Ta pasobra hende grandi ta biba nan bida apart, pesey nan no sa kico ta pasa den bida di nan yiu, cu ta biba den cas hunto cu nan, pasobra e tempo pa scucha e mucha no ta disponibel.
Tin asina tanto dolor den hogarnan pa falta di comunicacion entre mayor y yiu, y mas awor cu bida a bira digital pa hopi hende, pa un influencia materialista di telefon, den cual hende no ta comunica personal mas , muchanan ta pidi permiso pa sali of keda riba caya via un app.
Y tin hopi biaha cu e app no a drenta, y ta causando hopi discucion, of e mucha ta sconde su problema tras di un app.
Dios yuda nos.