No ta existi dos cielo, un pa hende grandi y un pa e hoben, e mesun santidad cu Dios ta exigi pa hende grandi e ta exigi pa e hoben tambe.( Revelacion 20:11-15).
Den e bijbel pa hoben tin tur cos scirbi mescos cu esun di hende grandi pasobra ta un Spirito di Dios tin cu a inspira hende pa scirbi bijbel.
No ta existi ningun versiculo den bijbel cu ta suave pa hoben, e Palabra ta forma e hoben, pasobra e palabra di Dios, ta berdadero.
Dios su palabra ta bisa cu : Aspira pa tin pas cu tur hende y santificacion sin cual ningun hende lo no mira Señor. ( Hebreonan 12:14). E palabra aki ta conta pa tanto hoben como adulto.
Ay di esnan cu ta gaña hoben cu palabra bunita , pa asina gana nan amistad , mientras cu e alma di e hoben ta corre peliger, ay di esnan cu ta apoya rebeldia bao di hoben, cu no kier coregi nan cu e berdad di Dios.
Den Mateo 18:6 Hesus ta bisa un palabra cla: Ma ken cu haci un di e chikitonan cu ta kere den Mi trompica, ta mihor pe cu un piedra di molina pisa wordo colga na su garganta y cu e wordo hoga den profundidad di laman.
Pablo a bisa Timoteo: Ordena y siña e cosnan aki. No laga ningun hende menosprecia bo hubentud, ma mas bien den palabra,conducta, amor y fe y puresa, demostra bo mes di ta un ehempel pa esnan cu ta kere.( 1 Timoteo 4:11-12).
Den un actividad di hoben, ningun lus por wordo baha of dim,creando un ambiente di scuridad, ningun momento, pasobra den cielo caminda e hoben ta anhela pa bay, no tin nada di scuridad, solamente lus, pasobra Dios ta lus.
Awor ta e tempo pa e hoben siña respeta su curpa y bisti decente, pasobra Dios ta demanda santidad di tur hende, serca Dios no tin cuenta di ta mucha nan ta, nos curpa ta tempel di Señor y e Spirito di Señor ta biba den dje.
Tur locual ta e palabra di Dios mester wordo aplica den e bida di hoben mescos cu e bida di e adulto, pasobra Dios ta rechasa orguyo y rebeldia.
Dios no a spaar ni su propio angelnan cu a rebeldia contra dj’E pero a tira nan den fierno y a condenanan na posnan di scuridad reserva pa huicio.( 2 Pedro 2:4).
Bijbel ta splica bon cla con Dios ta respalda hobennan cu ta biba den santidad, y obedencia na Dios.
Wak e respaldo cu Dios a duna e hoben David ora e mester a enfrenta Goliat.
E respaldo cu Dios a duna e hoben Hose den e tera di e Egypto, pasobra e tabata respeta Dios.
E respaldo cu Dios a duna e tres hobennan Sadrac, Mesac y Abednego, pasobra nan a rechasa idolatria.
E respaldo duna na e hoben Daniel ora e mester a bisa e Rey su berdad, aclarando e locual tabata scirbi riba muraya.( Daniel 5:25-30).
Jeremias tabata un mucha ora Señor a mande pa bai papia cu nacionnan, Y Señor a respalde den tur locual e mester a haci.
Ta tempo pa nos duna nos hobennan tur respaldo necesario den cosnan di Dios, pasobra enemigo ta jaag tras di hobennan.
Pero hobennan mester wordo confronta cu e berdad, mester wordo coregi y disiplina,mester congrega, mester wordo disipula, pa asina nan para firme den caminda di Dios.
Un hoben no por wordo permiti pa haci locual cu e kier, pasobra Dios ta exigi santidad for di tur hende.
