No ta boluntad di Dios pa nos keda pega den pasado di nos mes ni tampoco di ningun hende, Dios a hala nos atencion, pa evita cu nos ta cay den vengansa, amargura of nos ta husga, pasobra e ta bisa cu e mesun midi, cu bo midi cune, lo bo wordo midi.
E Palabra di Dios ta siña nos den buki di Philipensenan capitulo 3 vers 12-13-14 Pablo ta bisa: No cu mi a alcansa esaki caba, of mi a bira perfecto caba, ma mi ta haci tur esfuerso pa mi por gara, e loke pa cual mi tambe a wordo gara door di Cristo Hesus.
Rumannan mi no ta pretende cu mi mes a gare caba, ma un cos mi ta haci, lubidando loke ta keda atras y aspirando na loke ta dilanti.
Mi ta haci tur esfuerso pa alcansa e meta, pa haña e premio di e yamada celestial di Dios den Cristo Hesus.
Wow esey ta un declaracion fuerte y berdadero, cual Pablo ta splika nos di pone pasado un banda,gara na Dios y esforsa pa logra e meta, esey ta conta pa nos den tur trabao y nos hogar.
Genesis 19 vers 26 ta recorda nos: Ma esposa di Lot, kende tabata cana su tras , a draai wak patras y e a bira un pilar di salo.
Lucas Capitulo 9 vers 62 Hesus ta bisa: Ningun hende cu pone man na e ploeg y ta wak patras no ta apto pa e reino di Dios.
Nos no ta diseña pa wak patras, di ningun forma, tampoco di nos bida pasado, bijbel ta bisa cu nos ta criatura nobo den Cristo. Si bo ta haci un trabao, wak bo dilanti y hacie bon.
Conseho pa tur hende homber/ muher, si bo casa cu un persona cu a divorcia, of un vuida/(o), bo no tin nada di bay coba den bida di e exesposa/esposo of vuido(a) wak pa abo haci bo parti cual ta , cuida y respeta e persona, pasobra asina cu bo kier competi bida ta brua.Tampoco bo no tin nada di tira na cara di hende pa demostra cu bo ta miho, ni reclama ningun yiu tocante nan mama of nan tata.
Isaias capitulo 43 vers 18-19 Senor ta bisa: No recorda e cosnan di antes, ni keda pensa riba cosnan cu a pasa caba, mira Mi ta bay haci algo nobo, awor esaki ta bay sali na cla, boso no ta ripara esey? Lo Mi traha un caretera den seco y ruinan den desierto.
Señor kier pa nos los for di pasado y fiha nos bista riba nos autor y salbador kende ta Cristo Hesus.
Nos no por tene nos yuinan na curazon ora na haci un fout, ni tampoco tene nos esposa/(o) na nos curazon, nos tin di laga los y pordona, pasobra si nos no pordona Dios tampoco ta pordona nos.
Si un hende bisabo pa lanta cosnan bieuw di pasado di un otro persona y asina ofende e persona of pone hende haña rabia riba dje, e persona cu ta bisabo haci esey ta lew for di Dios, en bes di haci locual e ta manda bo, ta mihor bo haci oracion pe
Efesionan capitulo 4 vers 31+32 ta bisa; Laga tur amargura, furia, rabia, griteria, y calumnia,wordo kita for di boso, hunto cu tur malicia. Y sea cariñoso cu otro , misericordioso y pordonando otro mescos cu Dios den Cristo tambe a pordona boso.