Pastor Marcel Balootje: Rabia y odio den bo curazon ta haci bo ciego

Asina Señor ta bisa; 

*** Esun cu ta bisa cu e ta den lus y sinembargo ta odia su ruman, ta den scuridad ainda.

*** Esun cu ta stima su ruman ta permanece den lus y no tin motibo den dje pa trompica.

*** Ma esun cu ta odia su ruman ta den scuridad y ta cana den scuridad y e no sa na unda e ta bay, pasobra e scuridad a siega su wowonan.( 1Juan 2:9-11).

*** Ken cu ta odia su ruman ta un matado: y boso sa cu ningun matado tin bida eterno ta permanece den dje..( 1 Juan 3:15).

Resultado di rabia y odio por wordo mira rond mundo, y tambe serca nos, y con rabia y odio ta destrui, Famia, Matrimonio y Hubentud.

Nos no tin di mester di tapa solo cu un dede ni tampoco, busca ningun hende di afo pa bin siña nos cana den nos propio cas.

* Cuanto Divorcio no a tuma lugar durante e ultimo añanan y cuanto no ta tumando lugar actualmente?

* Cuanto hende cu tabata biba hunto no a separa for di otro?

* Laga nos tene cuenta cu e nivel di rabia, odio, y malicia cu Diabel a sembra bao di nos hubentud cu ta alarmante.

Papiamento malo constant riba hende ta ocasiona odio den bo curazon sin bo sa, pasobra e enemigo di nos alma ta hiba bo den e caya di amargura y odio. Y bo ta bira ciego cu ni maske e persona haci bon of a yega di haci bon den pasado , e odio ta ciega bo, cu bo no ta mire.

Nos tur ta mire ta sosode, y no tin nada di sconde, e ta proba mundialmente: Un gobernante cu su curazon ta yena cu rabia y odio, no por goberna su pais, pasobra Dios no ta cune, e por tin un gabinete di 500 Parlamentario y rondona di 1000 minister pero si Dios no ta cune, e ta riba su propio forsa.

E ta depende di hende.

Consecuencia di esey ta locual ta pasando: Tin preso politico, Tin crimen politico,pasobra hende kier kita nan oponente politico for di caminda, y nos tin odio politico den pueblo, cual ta esun di mas peligroso cu ta existi, pasobra hopi cos cu mester bay bon ta wordo stanca. Ta solamente un arepentimento genuino por cambia curazon di hende.  

Ora muchanan lanta den cas mira rabia,odio, violencia,malicia y inmoralidad, si nan no haña yudansa, na prome lugar di Dios pa cambia nan curason y amor di nan mayornan pa nan educacion,nos ta lantando monsternan pa comunidad, wak den e ultimo cuater aña cuanto crimen sangriento y cruel a tuma lugar y tuma e promedio di e edad di e criminalnan.

Hende ta cla pa tira e falta riba internet, telefon, droga, alcohol, etc, pero dilanti di Dios semper e mayor ta keda responsabel pa su yuinan.

Esun cu ta odia ta disimula esey cu su lipnan, ma den su curason e ta montona engaño, ora e papia cariñoso asina no kere, pasobra tin siete abominacion den su curason.

Maske su odio ta purba tapa su mes cu engaño, su maldad lo wordo revela dilanti di asamblea.(Proverbionan 26:24-26).

Asina Senjor ta bisa:

***No calumnia meymey di bo pueblo, y no actua contra bida di bo prohimo.

***No odia bo ruman den bo curason, reprende bo prohimo, ma no cay den pica pa su motibo.

***No tuma vengansa, ni tene rencor contra e yuinan di bo pueblo, ma stima bo prohimo manera bo mes.( Leviticonan 19:16-17-18).