Beibel ta relata na nos con Moises a keda sin drenta tera priminti , pa motibo di rabia, ora e pueblo a murmura contra Dios , Moises a bay den oracion, Dios a papia cune pero toch, Moises sali for di oracion, y bin zundra e pueblo y esey a tabata e causa , cu e a dal e barranca en bes di papia cu e barranca y asina stroba e pueblo di glorifica Dios.
Rabia no ta obra pa bon den ningun caso, pa motibo di rabia hende ta perde famia, trabao. Integridad, y muchu mas te por yega asina lew, cu hende ta bay sera, of tin biaha haña stroke pa motibo di rabia.
Hopi hende ta kere cu ta masha cos pa broma, bisa cu mi ta mal rabia y mi fuse a bula, tin hende ta hasta cana cu sticker di rabia, tin hopi hende ta usa rabia pa manipula otro, pero den ningun caso bo rabia no ta un bendicion pa bo bida. Y bo rabia por hinca bo den un problema pa henter bo bida.
Ningun decision tuma cu rabia no ta efectivo.
Bo no por coregi cu rabia, bo no por rasona ora bo ta rabia,ningun hende no por comunica cu Dios ora e ta rabia, rabia no por ofrece amor, Rabia ta un mal Spirito, Spirito Santo no ta presente den rabia. Rabia ta puro carni.
Evita di lanta rabia den Famia, den bo hogar, Evita di sembra rabia den bo yiunan, Evita di lanta rabia contra bisiña , No lanta rabia den politica, pasobra rabia no ta cumbini ningun hende.
Nos mester avisa nos pueblo pasobra rabia ta causando hopi dolor, hopi violencia domestico, hopi kiebro den famia, hopi insulto verbal y fisico, y algo mester wordo haci den nos situacion.
E unico manera pa librabo di rabia ta di entrega bo rabia na Dios, y pidi Dios yudabo, bo oracion ta hopi importante , pasobra bo contacto cu Dios lo trece e liberacion necesario pa rabia.
Rabia no ta amigo di ningun hende, pasobra den momento nan di rabia hende , ta perde contacto cu Dios, y ta wordo domina door di e enemigo, y asina ora bo rabia baha lo bo riba para e daño cu bo ahaci na bo mes , na otro, y na comunidad.
Palabra di Dios ta bisa pa nos rabia pero no peca, rabia ta un situacion cu nos mester por controla, no ta existi ningun hende cu no ta rabia, pero si bo no controla bo rabia bo ta bira victima di bo rabia.
Hopi biaha ora hende rabia nan ta cuminsa desea malo pa otro y den bista di Dios deseo tambe ta pica, pasobra tin hende ta yega asina lew di desea morto pa otro, desea Perdida pa otro, desea fracaso pa otro, kico ta pasa cu un hende asina, awel e Spirito di Dios lo aparta for di bo.
Ehempel Rey Saul tabtain rabia riba David, y wak con rey Saul a termina, Absalon tabatin rabia riba David su mes Tata, y wak con Absalon a termina, Ahitofel tabatin rabia riba David, e a desea David su morto, y wak con Ahitofel a termina. Jezabel a desea morto di profeta Elias, y wak con Jezabel a termina.
Cuanto hende no a escohe pa usa droga pasobra nan ta rabia, of bebe pasobra nan ta rabia, of destrui propiedad di hende of maltrata otro pasobra nan ta rabia.
Un conseho permanente, si bo ta rabia, busca Dios urgente, arepenti, pidi Dios yuda bo y librabo, pordona esun cu bo tin di pordona, no alimenta bo rabia cu pensamento negativo, no busca conseho serca hende violento, no scirbi insulto riba facebook, ni tampoco manda whatssap di amenasa, pasobra tur esaki ta cultiva rabia, cu den un momento cu bo no spera por destrui bo mes.
Rabia ta un asunto cu mester atende cune urgente y no laga diabel cohe ventaha, pero pordona y reconcilia, y asina trece paz den bo curazon, y tambe tin paz cu Dios y bo prohimo.
Sinceramente
Pastor Marcel Balootje
