Den tur inseguridad cu ta rondona nos cada momento, ta tempo pa nos busca e presencia di Dios constantemente. E mundo ta moviendo manera un machine, tur hende kier haci locual nan kier , sin pensa y sin respeta Dios y otronan.Pero semper e presencia di Dios lo ta cu esnan cu ta kere den Dios.
No ta pornada e palabra di Dios ta bisa den Hebreonan 13:5 ; Laga boso karakter ta liber di amor pa placa, y sea contento cu loke boso tin, pasobra E mes a bisa: Nunca lo mi bandona bo,y nunca lo Mi laga bo desampara, y asina cu nos por bisa, Señor ta mi yudado, lo mi no tin miedo, kico hende por haci mi?
Maske mi ta cana den e vaye di sombra di morto , mi no tin miedo di maldad, pasobra Abo ta cu mi Bo bara y Bo garoti ta consolami.( Salmo 23:4).
Ora e presencia di Dios ta den nos bida nos tin pas. Pesey e presencia di pica y inmoralidad, ta kita nos pas, y ora bo no tin pas, semper bo ta pensa cu hende ta huzga bo, pero no ta esey ta e caso, ta e presencia di Dios no tey, pasobra oguyo y maldad kier domina bo bida.
E presencia di Dios ta e Spirito di Dios, pesey David a roga na Señor bisando: No tira mi for di bo presencia, y no kita Bo Spirito Santo for di mi. Dunami atrobe e goso di bo salbacion, y sostenemi cu un spirito boluntario.( Salmo 51:11-12).
Lo bo mustra mi e bereha di bida, den Bo presencia tin plenitud di goso, na Bo man drechi tin delicia pa semper.( Salmo 16:11).
Nos mester ta masha atento cual ta e cosnan cu ta hala nos for di presencia Dios, cual ta e cosnan cu ta pone e presencia di Dios bandona, nos bida y nos hogar , pasobra caminda e presencia di Dios no ta e scuridad mesora kier tuma over.
Tuma nota por ehempel, asina cu Samson a dicidi di bay Gaza, e presencia di Dios a aparta for di dje.
Asina cu David a dicidi di bay comete adulterio cu Betsabe, despues cu e a wordo avisa cu Betsabe ta casa di Urias, e presencia di Dios a bandone, pa e motibo ey tambe e kier a sconde su pica.
Pesey den Salmo 51 e mes ta bisa no tirami for di bo presencia, pasobra e a experiencia esey , despues di comete su maldad.. Laga nos no lubida cu e prome cos cu Adam cu Eva a haci despues di a desobedece Dios , nan a bay sconde.Pica ta pone hende sconde, pero ningun hende no por sconde for di e presencia di Dios.
Den Daniel capitulo 3 : 24-25 nos ta mira claramente con e presencia di Dios tabata hunto cu Sadrac, Mesac y Abednego
Den Exodo 3:2-6 nos por mira con e presencia di Dios tabata dilanti di Moises, dunando instruccion na Moises.
Den Daniel capitulo 6:21 e presencia di Dios tabata den cueba hunto cu Daniel .
Den Mateo 14:22-27 e presencia di Hesus a trece curashi pa e disipelnan.
Semper nos mester sigi busca e presencia di Dios, den oracion, lesando e palabra di Dios, bishitando nos iglesia, bibando un bida cu ta agrada Dios.
E presencia di Dios den nos bida , ta pone hende reconoce nos, como sirbido di Dios, den nos confiansa y nos fe den Dios.( Hechonan 4:13).
Permanece den e presencia di Dios, pasobra cosnan gandi Dios tin pa nos.
