Envidia y jaloersheid ta existi for di principio di mundo, y awor e asunto a bira peor, pasobra papia malo di hende, lanta falso testimonio, haci redo , kibra otro a bira algo casi normal.
Pero riba tur esey e palabra di Dios tin poder, pasobra ta para scirbi cu cielo y tera lo pasa, pero e palabra di Dios lo permanece pa semper. Locual Dios a bisa y a destina pa bo ningun hende por kite for di bo.
Dios ta habri un porta pa bo, pero e no ta duna bo e yabi, esey ta bo keda humilde y tene cuenta cu bo mester depende di Dios.
Hopi biaha Dios ta habri porta pa hende y nan ta kere cu nan ta manda, y nan por haci manera nan kier, pero esey semper a duna mal resultado.
Tin varios forma den cual bo ta reconoce cu ta Dios a habri e porta pa bo.
Dios nunca ta habri un porta cu ta contradeci su palabra.( Santiago 1:13-14.
Tene bon cuenta cu tur locual Dios haci semper Su boluntad lo prevalece.( Romanonan 12:2).
Dios no ta destrui un famia pa haci otro famia felis.( Malakias 2:16).
Dios no ta participa den ningun asunto di yugo desigual.(2 Corintionan 6:14)
E porta habri lo no trece ningun problema pa bo, pasobra bendicion di Dios , ta enrikece, y no ta trece problema hunto cune.( Proverbionan 10:22). Bo por conta constantemente cu ayudo di Dios,pasobra Dios a priminti cu semper ey lo tey pa nos.
Den cosnan di Dios , idolatria no tin lugar, pasobra Dios no tin nada di haber cu imagen traha pa man di hende.( 1 Corintionan 6:16).
E porta habri semper ta bini cu confirmacion di Dios. (Revelacion 3:7-8).
E porta lo pone bo depende di Dios ( Mateo 6:33). (Hebreonan 11;6).
Tur porta cu Dios habri , ta pa Dios por ricibi e Gloria, Dios no ta habri porta di strobacion den bida di ningun hende.
Si bo ta un damita teenager y bo ta enamora di un guy adicto , alcoholico, cu ta dal bo cada rato, sali for di e asunto ey, pasobra Dios no ta den.
Tin hopi problema den cual awendia hende ta hinca nan curpa, pa motibo di sensualidad, pero hopi no sa cu caminda tin sensualidad ta emocion ta manda, y e Spirito di Dios, no ta traha a base di emocion, e ta move caminda tin amor, puresa, y temor di Dios.
Dios por habri un porta , pero tambe tin un reto , un esfuerso cu nos mester haci, pa nos yega na e proposito cu Dios tin pa nos bida. ( Josue 1:6).
Pasobra a habri un porta hancho y eficas, y tin hopi adversario. ( 1Corintionan 16:9).
Ora Dios sera un porta, ta nifica cu e kier guia nos na algo mihor, hende carnal ta pensa cu e persona a fracasa, pasobra e a bisa cu Dios a habri un porta, y despues e proyecto, plan of ministerio no a sigi na e mesun lugar, pero Dios tin e poder y e misericordia, pa duna nos un diseño nobo, E kier prepara nos miho, pasobra e cos cu E kier duna nos ta asina grandi cu nos no ta cla pa trata cune ainda, y Dios kier duna nos mas preparacion.( 2 Samuel 5:22-25).
Awe ta un bon dia pa nos reconoce Dios den nos bida, y laga nos curason ta sincero cu Dios, pa asina nos por mira Su grandesa. Ora Dios habri un porta ningun hende por sere.