Tin 191 versiculo den bijbel cu ta avisa hende tocante uso di alcohol, con peligroso e ta, y ta tempo pa hende stop di sconde tras di Juan 2:11 y bisa Hesus mes a traha biña, por favor realisa cu e biña cu Hesus a traha na e casamento na Canaan di Galilea, no ta e alcohol fabrica di awendia.
!!! Hopi hende ta bebe, homber, muher, hoben y hasta mucha,pero hopi di nan no sa kico, nan ta bebe.
Tene cuenta cu no ta tur hende cu ta bebe ta sufri di depresion, ni tampoco salud mental, pero hopi ta bebe pa cobardia, y miedo di enfrenta bida.
Awendia tin hopi ta bebe pa competi,cual ta bobedad.
!!! Hende ta bebe for di control, y ningun hende no por controla ki ora nan ta bira burachi, pasobra alcohol ta engañoso, tin biaha bo ta kere cu bo ta bon, y cu bo por yega cas, pero ta ora bo sinta tras di stuur y cuminsa maniobra pa bo yega cas na e momento ey bo ta sinti, cu bo no por, y enbes di busca yudansa, hende ta bay corre mas duro posibel pa yega cas, cu e consequencia cu bo por spera ora un hende ta maneha burachi.
No ta tur dia cu un hende bebe e ta bira burachi mesun cos , ta depende di su presion di sanger, ta depende si e persona ta come ora e ta bebe, ta depende di cual ambiente e ta bebe, y mas peligroso ta ora un hende ta bebe cu rabia of cu duele, pasobra e ora ey e spirito di alcohol ta tuma control di su mente, y e lo bebe te ora e ta lastra abao.
Biña ta un hacido di bofon, bibida sterki ta un borotado, y esun cu ta bao di su influencia no ta sabi.(Proverbionan 20:1).
Envidia, buracheria,parandiamento,y cosnan asina aki,di cual mi ta spierta boso di antemano,cu esnan cu ta practica,sorto di cosnan asina aki lo no hereda e reino di Dios.(Galationan 5:21).
!!! Nos ta kere cu si compania di Electricidad duna un conteo cuanto palo di lus, a wordo ranca e aña aki pa motibo di buracheria, of Cuerpo Policial, duna un rapport, e por tin su efecto riba comportacion di esnan cu ta corre burachi, causa accidente, ranca palu di lus, y hopi biaha papelnan no ta na ordo, of mas pio ainda, no tin rijbewijs, y ta sali na cla cu nan ta menor di edad.
Den un cas caminda mayornan ta siña nan yuinan con bebe, of hende grandi ta sinta bebe bira burachi dilanti di mucha, ta un cas caminda iresponsabilidad ta reina, pasobra e efecto riba e mucha su bida ta hopi doloroso.
Antes tabata dificil pa bo topa un muher burachi riba caya, pero awor hasta durante dia esey ta sosode.
E asunto di bebe den grupo, pa demostra ken por wanta mas alcohol, ta puro bobedad, pasobra ora tin accident, Happy Hour no ta yuda bo cubri e gasto.
Nos damanan mester mantene nan norma y balor halto y no wak riba otro hende, pero wak pa abo ta decente, pa abo ta respeta.
Ki futuro un hoben tin cu ta cuminsa bebe cu 12 aña , pasobra ta conoci cu alcohol ta stroba hende di studia, pasobra les no ta drenta cabes di hende burachi.
Ay di esnan cu ta lanta mainta tempran,pa corre tras di bibida sterki, cu ta keda lanta te anochi laat, te ora bibida subi na nan cabes.( Isaias 5:11).
Buracheria ta pica,no lubida.
