Pastor Marcel Balootje: Pica ta pica, Dios no ta cambia, ta hende mester arepenti

Dios tin autoridad Supremo y Poder Absoluto riba tur cos. Dios ta esun cu ta dicidi. 

Dios merece tur Honor y Gloria y Su misericordia ta pa semper.

Ora nos mira riba mundo con hende ta competi pa kibra otro, hende ta venga otro, desicion ta wordo tuma contra otro, djis pasobra nos kier demostra nos orguyo y nos poder terenal, nos ta observa cuanto falta di conocemento di Dios tin serca hende cu ta pretende di ta sabi.

Pasobra nan no ta compronde cu tur cos ta pa un tempo riba e mundo aki, pero cosnan di Dios ta eterno y ningun hende no por bringa Dios.

Hende ta tuma desicion doloroso contra otro, pero sin tene cuenta cu e pueblo ta sufri, y cu pan ta bira chikito riba mesa den cas di Famia.

Tin tres cos cu Dios no por haci, Dios no ta gaña, Dios no ta cambia, Dios no por permiti pecador drenta cielo.

Ta para scirbi lo siguiente:

Malaquias 3:6 ta para scirbi: Pasobra Ami Señor no ta cambia, pesey boso, O yiu hombernan di Jacob no a wordo destrui.

Santiago 1:17 ta para scirbi: Tur bon regalo, y tur don perfecto ta bin for di ariba, y ta baha bin, for di e Tata di lusnan, serca kende no tin variacion, ni sombra di cambio.

Number 23:19 ta para scirbi: Dios no ta hende cu E lo gaña,ni yiu di hende, cu E lo repenti.

Acaso E a bisa, y E lo no hacie? Of E a papia, y E lo no cumpli? 

Isaias 40:8 ta para scirbi: Yerba ta seca, flor ta marchita,ma e palabra di nos Dios ta permanece pa semper.

Salmo 102:25-26-27 ta para scirbi: For di principio Bo a funda tera,y e cielonan ta e obra di bo mannan. Nan lo perece , ma Abo lo parmanece, nan tur lo gasta manera un bisti, manera paña lo Bo cambia nan, y nan lo ta cambia.Ma Abo ta keda mescos,y Bo añanan no tin fin.

Isaias 40:28 ta para scirbi: Bo no sa? Bo no a tende? E dios Eterno, e Señor,e Creador di e finanan di tera, no ta bira cansa ni fatiga, Su comprendemento ta inescrudiñabel ,

Salmo 90:2 ta para scirbi; Prome cu e seronan a nace, y cu bo a forma tera y mundo si, for di eternidad te na eternidad, Abo ta Dios.

Isaias 44:6 ta para scirbi: asina Señor e Rey di Israel, y su Redentor, e Señor di ehercitonan ta bisa: Ami ta e prome y ami Ta e ultimo, y no tin Dios fuera di Mi.

Revelacion of Apocalipsis 22:13 ta para scirbi: Ami ta e Alfa y e Omega, e prome y e Ultimo, e Principio y e fin.

Dios a primiti cu E lo sana nos tera ,ora nos cu ta su pueblo bini hunto y haci oracion ( 2 Cronicanan 7:14).

Dios lo supli pa nos necesidadnan ora nos pone Dios na prome lugar .( Filipensenan 4:19).

Dios a priminti sabiduria na nos ora nos pidi den Fe y sin ningun duda. ( Santiago 1:6).

Awendia hende kier cambia ley, hende kier cambia nan curpa, hende kier cambia nan identidad, hende hasta ta tribi di kier cambia lus pa scuridad .( Daniel 7:25).

E enemigo , e serpiente antiguo, kende a bini solamente, pa horta , pa mata y pa destrui kier mantene hende den scuridad.

Pero ta para scirbi: 1 Juan 1:9 : Si nos confesa nos picanan, E ta fiel y husto pa pordona nos picanan y pa limpia nos di tur inhusticia.