Ta para scirbi den e buki di Santiago 4 capitulo vers 17: Pesey pa esun cu sa di haci loke ta bon. Y no ta hacie, pa e esaki ta pica.
Pesey e palabra di Dios ta bisa nos den Romanos 12:2 : No sea conforme e mundo aki, ma sea transforma pa medio di e renobamento di boso mente, pa boso por compronde, kico ta e bon y agradabel y perfecto boluntad di Dios.
No stima e mundo, ni e cosnan di e mundo. Si un hende ta stima mundo,e amor di e Tata no ta den dje. Pasobra tur locual tin den mundo, e deseo di carni, y e deseo di wowo, y e orguyo di bida, no ta bin di e Tata, sino di e mundo.E mundo ta pasa bay y su deseonan tambe, ma esun cu ta haci boluntad di Dios, lo permanece pa semper. ( 1 Juan 2:15-17),
E palabra di Dios ta bisa nos den Isaias 5:20: Ay di esnan cu ta yama loke ta malo bon, y loke ta bon malo, loke ta scuridad lus, y loke ta lus scuridad, loke ta marga dushi, y loke ta dushi marga.
Hende mester tene bon cuenta ora di persisti den maldad, conociendo e bondad di Dios, conociendo su misericordia, conociendo locual Dios ta odia, y toch pa motibo di capricho y curazon duro cu no kier pordona ta sigi den maldad.
Ora Dios ta manda nos pordona, ta pasobra Dios kier nos libertad, pero si nos ta hunga rol di orguyoso, duro y rebelde y no kier reconoce Dios, nos lo sinti e furia di Dios.
Awor mas cu nunca den e tempo trabahoso aki, nos mester depende mas di Dios, pasobra ta solamente Dios por saca Su pueblo for di tur e peligronan cu ta na caminda.
A yega tempo pa nos por separa for di maldad, busca e caminda di Dios, y sigi Dios, aparta for di tur locual ta impuresa, pasobra hopi biaha hende ta busca beneficio for di maldad,envez di aparta for di maldad.
Bo ta keda straño di mira con hende cu mester sa mihor ta apoya maldad, perversidad, y inmoralidad, buscando nan propio interes, sin tene cuenta ken of cual famia por wordo afecta.
Tur esnan cu no kier reconoce Cristo Hesus como nan Señor y Salbador, ta gaña nan mes pasobra no tin otro caminda. Cristo Hesus ta y ta keda e unico caminda di berdad y bida.
Awor no ta bon pa hende provoca Dios, no ta bon pa hende scucha e bos di Dios y sigi den nan maldad, comosifuera nan no tin cuenta of no ta respeta Dios. pasobra mescos cu den pasado , Dios a actua cu man duro contra un pueblo murmurador y rebelde, awe e ta spierta nos pa medio di Su palabra di tur consecuencia.
Wak bon rond di nos, y nos tur ta ripara , con hende grandi ta instrui mucha, pa sigi cana den mesun caminda di eror, cu nan a cana, den nan hubentud, y nan kier mira otro resultado for di e hubentud, pero bo no por cosecha diferente, si bo ta sembrando mesun cos.
Dios no por wordo engaña tur locual hende sembra esey nan lo cosecha, hende ta lubida, cu Dios conoce cada intento di nan pensamento,Dios conoce tur curason.
Pesey si awe boso scucha Su bos no haci boso curason duro, pasobra duresa di curason ta tempo perdi. Dilanti di Dios tur curason mester arepenti, tur lenga mester confesa, y evita di montona furia di Dios.( Romanonan 2;5).
