Hopi biaha hende ta kere den placa, ta stima placa, ta laga placa dirigi nan bida, y domina nan bida, y nan ta lubida cu tin un Dios Todopoderoso, cu ta doño di tur cos y cu tin dominio riba tur cos.
Dios ta purba nos, pa nos crecemento, pa puresa, pa obedencia, pa sumision, pa forma karakter, pa kibra orguyo, pa para rebeldia, y mas cu tur cos pasobra Dios stima nos, y Dios kier lo mehor pa nos.
***Dios ta usa prueba den nos bida, pa preparacion , pa un puesto nobo, of un nivel spiritual mas halto den nos bida.
Por ehemepel e prueba grandi cu Pedro a pasa aden, den cual Pedro a nenga Cristo, no ta djis algo simpel .
Pero ta un prueba, pa siña cu e tin cu bira responsabel pa cosnan di Dios, pa e no corre bay ora cos bira dificil.
***Y nos tur por wak kico a pasa den e encuentro cu Hesus tabatin cu Pedro na e laman di Tiberias den Juan capitulo 21:1-17, tabatin arepentimento, tabatin reconciliacion, y despues a bini e encargo.
Den e prueba di Moises di 40 aña den desierto, Dios mester a forma e karakter di Moises, pasobra na un momento Moises tabata kere cu e por libera e pueblo di Israel pa medio di su propio forsa.
Y Dios mester a domina su carni, pa asina e conoce e cosnan spiritual di Dios.
Tene na cuenta cu na prome lugar Moises a mata un hende, y esey no tabata boluntad di Dios, e tabata pensa den forsa bruto y sabiduria mundano, pero esey no tabata den e plan di Dios.
Despues di pasa 40 aña den desierto como wardado di carne pa e bira manso, humilde y obediente, Dios a yame pa e libra e pueblo, y a dune un baston den su man, pa e bay enfrenta Faraon, su pueblo y su ehercito, cual tabata esun di mas fuerte cu tabata existi na e tempo ey.
!!! Dios kier a mustra Moises, for di e tempo ey cu no ta cu Forsa ni cu Poder, pero pa medio di su Spirito.
***Dios no a duna Moises ningun arma, pero e confiansa den Dios y e fe den palabra di Dios, y e gracia cu Moises a ricibi di Dios a yude pa e por a saca e pueblo for di Egypto.
Dios a duna un demostracion ( Exodo 14:13-18) ( Salmo 46:10-11).
Door di hopi tribulacion, nos mester drenta e reino di Dios ( Hechonan 14:22).
Dios ta purba nos pa nos ta puro manera oro, pa e por usa nos pa Su honra y Su gloria.
Dios ta purba nos pa nos keda dependiente di Dios y no bira orguyuso y pone Dios su cara na berguensa.
Dios tin su manera di prepara hende pa tur cos, hopi biaha hende tin hopi estudio, por ehempel estudio universitario of biblico.
Pero te ainda nan mester wordo prepara den humildad, pa asina saca orguyo y arogancia for di nan mente y nan bida, pa nan no sinti nan mes mas cu otro hende, pasobra serca Dios ta sirbido nos tur ta.
Ora nos sirbi Dios di henter nos alma y curazon, cumpli cu e mandato cu Dios a duna nos , ora E yama nos bin cas serca dj’E, E ta bisa bon bini siervo.
Ora nos busca Dios meymey di nos prueba, Dios ta pasa den e prueba hunto cu nos y nos lo sali ta lombra manera oro.( Job 23;10).