Nos tur ta na altura cu Carnaval ta e fiesta mas grandi di Idolatria y Cherchamento di Dios cu ta tuma lugar cerca nos y na diferente otro parti di mundo.
Tur hende ta na altura cu durante e temporada aki cosnan for di ordo ta sosode, especialmente ora e ta den su fase final.
Laga nos tira un bista riba e uso excesivo di alcohol, wak con alcohol ta wordo usa door di nos hubentud, na cada skina di caya, bo ta topa, hobennan ta bebe, anto bebidanan caro cual como un persona adulto bo ta puntra bo mes na unda a sali tanto placa asina pa bebe.
Acompaña pa e uso di droga, e ekipo ta bira completo cual ta produci hende intoxica, cu no por para riba nan pia.
Kico ta pasa ora hende ta chercha Dios?
Tur cherchamento di Dios ta un hecho carnal, den cual hende ta falta respet pa Dios y nan mes, y door di esey beibel ta bisa cu nan lo cosecha corupcion, cual ta nifica e consecuencia di locual nan a sembra.( Galationan 6:7-8).
Pesey nos tin di comprende tur e accidentenan cu ta tuma lugar y tur e bagamunderia cu nos ta mira constantemente, y toch hende no kier tende.
Ora hende ta tenta of chercha Dios, spirito malo ta cuminsa manifesta den e ambiente, hincando hende den scuridad profundo, y ora nan kier ripara ya e daño a wordo haci, na nan bida, cas of famia.
E homber fuerte ta un personalidad satanico (demoño) cu ta controla e teritorio, cu ta reponsabel pa tur maldad cu ta tuma lugar , pasobra e tin hopi spirito malo den su servicio. Esaki nan tin hasta capacidad di gaña hasta hende cu ta den Señor pa nan participa , bao di e capa cu nada no ta pasa, ta cos di un rato y ta fiesta di pueblo.
Ta un temporada di hopi desobedencia na Dios, pero e pueblo cu conoce su Dios mester para firme.
E cos aki ta bay hopi mas profundo cu nos ta kere, spiritualmente e ta haciendo un daño hopi grandi, pasobra spiritonan cu ta move den e temporada aki ta spirito di tur clase di inmoralidad, amargura, resentimento, falta di pordon, odio , rabia, mal comportacion,pleito, homicidio, suicidio,violencia, perversidad,iresponsabilidad, adulterio y fornicacion.
Pesey ta para scirbi den 2 Corintionan 10:3-6 : Cu aunke nos ta cana den carni, nos no ta bataya den carni, pasobra e armanan cu nos ta bataya cune, no ta carnal, ma poderoso den Dios pa basha fortalesanan abao. Y pa destrui tur speculacion y tur arogancia cu ta lanta contra e conocemento di Dios.
Ta masha notabel e cantidad di sushi cu ta aumenta dia pa dia riba nos isla, y tur caminda riba nos isla.
Den e mundo spiritual sushi ta nifica, pica, scuridad, inferioridad, negativismo, maldad , pesey nos kier habri wowo di tur hende pa nan sa cu e asunto aki no ta simplemente un asunto di decadencia,y iresponsabilidad ,pero tambe cu e diabel ta bezig yenando nos isla cu tur tipo di sushi spiritual.
Caminda tin musca tur hende sa cu tin sushi y bestia morto, awel esun cu tin wowo mira, y esun cu tin horea tende locual Dios kier spierta nos di dje.
Ya tempo pa nos lanta riba den Nomber di Cristo Hesus y mara e homber fuerte di inmoralidad riba e isla aki, pasobra ta cosnan hopi serio ta na caminda, si nos no tuma un accion, di berdad, y para firme contra libertinahe.
