Desobedencia ta reinando tur caminda, tanto den hecho, como den palabra, respet pa Dios ta wordo exclui cada momento, hende kier biba manera nan kier, sin tene cuenta cu otro, tampoco cu ley, mas tristo ainda,sin tene cuenta cu Dios.
Mientas tanto maldad, inmoralidad, malicia, perversidad, di un forma suave ta buscando entrada tur caminda.
E edad pa ta envolvi den cosnan baho y practicamente bisa cosnan bergonsoso ta bahando dia tras dia, mientras cu hende grandi ta presta nan mes pa bagamunderia.
E balor di obedencia na Dios ta grandi, pasobra obedencia ta trece bendicion, cual ta corre for di cabes te na pia, pasobra ora mayornan ta biba den obedencia na Dios, henter e cas ta bendiciona.
Pero ora hende grandi ta kere cu nan ta mucha, y ta haci cosnan cu mucha mes ta duda pa haci , anto nos tur sa cu e hogar ta cay den decadencia pa motibo di negligencia di mayor.
Tira un bista y wak con bao di nos hobennan vengansa y reglamento di cuenta ta reina,malo ta wordo paga cu malo, golpi cu golpi, no tin rasonamento di ningun banda.
Pero con un hoben por demostra amabilidad , si na cas e no conoce bondad, sino pleito, provocacion y violencia, ocasiona door di su propio mayornan cu no ta biba den obedencia na Dios of pa mas tristo no kier biba den obedencia na Dios.
Hopi mayor no kier comprende cu nan desobedencia na Dios ta refleha den nan famia,y cu desobedencia ta lanta furia di Dios ( Colosensenan 3:6).
Den Deutoronomio 28:1 Dios a priminti lo siguiente:
Awor lo sosode cu si bo obedece cu tur diligencia Señor bo Dios,y percura di cumpli cu tur Su mandamentonan,cu mi ta ordena bo awe, Señor lo halsa bo riba tur e nacionnan di mundo. Y tur e bendicionnan aki lo bin riba bo y alcansa bo, si bo obedece Señor bo Dios.
Señor semper ta cumpli cu su promesa, locual Dios a priminti miles di aña pasa keto bay ta vigente, pa nos tur cu kier biba den obedencia na Dios.
Obedencia na Dios ta trece rikesa spiritual y material, pero caminda placa ta goberna bida, y respet pa Dios ta wordo poni un banda, bo por ripara cu den tur posesion di material, tristesa tey presente, pasobra desobedencia ta kita goso di hende.
Ta e bendicion di Señor ta haci rico,y e no ta agrega tristesa den dje.( Proverbionan 10:22).
Ningun caminda no ta para scirbi, cu hende mester perhudica otro den ningun forma pa asina nan alcansa felicidad pa nan mes.
Pesey ta tempo pa nos hobennan cuminsa pensa un tiki, cu ningun hende cu kier envolve nan cu arma y droga, cu violencia y cu matamento, no ta hende cu kier mira nan bon, asina ey no ta e forma di bira rico.
Dios ta poderoso pa haci tur gracia, abunda pa boso,asina cu teniendo semper, sufisiente di tur cos,boso por tin abundancia, pa tur bon obra.
Ta tempo pa pone un banda tur rabia, furia,malisia, calumnia,y palabra sushi for di boso boca.
Y bisti un curason di compasion,cariño,humildad,mansedumbre,y pasenshi.
Laga tur amargura,furia , rabia, griteria,y calumnia,wordo kita for di boso,hunto cu tur malisia.
Y sea cariñoso cu otro, misericordioso,pordonando otro,mescos cu Dios den Cristo tambe a pordona boso.( Efesionan 4:31).
Bendicion di Dios semper lo tey pa esnan cu ta biba den obedencia na Dios, pasobra locual cu Dios tin pa abo , ta pa bo e ta, ningun hende por kite for di bo, Dios no ta lubida riba su yuinan.