Tur caminda cu orguyo presenta e ta laga desaster atras, den tur organisacion caminda orguyo drenta, e ta haci hopi daño hopi.
Ora orguyo drenta un matrimonio, e pareha sea e homber of e muher mester lanta for di soño y reconoce cu maldad a bati na porta, y uni den oracion pa Dios manda su ayudo , y trece bendicion.
Orguyo ta di diabel y humildad ta di Dios, y Dios ya splica e esey hopi cla bisando;Dios ta resisti e orguyosonan , ma ta duna gracia na e humildenan.( Santiago 4:6).
Ora un hende ta den su asunto di orguyo , arogancia, inmoralidad y falta di respet, pa Dios su palabra , Dios ta resisti un persona asina, dicon Dios ta resistiti e persona?
Pasobra mientras cu un hende ta persisti pa keda den su orguyo, den su inmoralidad, y no kier arepenti di su pica, e ta keda separa for di Dios.( Isaias 59:2) ( 1 Corintionan 15:17) ( Isaias 1:18).
Dios ta ofrece na tur hende (Juan 3:16-18) pasobra Dios no kier pa ningun hende bay perdi ma pa nan tin bida eterno den Cristo Hesus.
Hopi famia ta kibra pa motibo di orguyo, pasobra ningun hende no kier pordona, tampoco ningun hende kier pidi despensa of reconoce cu nan tabata robes.
Ta orguyo ta pone hende husga otro, haci manera nan ta bon hende y cu nunca nan a kibra un koppi, y cu nan si ta bon, mas limpi cu tur hende.
Orguyo ta pone hende corre bay, pero humildad y pordon ta trece reconciliacion.
Ta masha facil pa corre bay pero pa bini bek ta exigi curashi,dominio propio,sabiduria di Dios, no esun terenal, natural, diabolico,( Santiago 3:15+16+17) pero sabiduria puro y berdadero cu ta bini di ariba.
Un homber orguyoso cu ta corre bay laga su yuinan atras pa su casa y e no ta cria su yuinan, ta un persona bobo, pasobra kico cu bo haci bo yuinan ta keda bo yuinan y abo como tata ta prome responsabel pa nan.
Ora orguyo bini,deshonor tambe ta bini, ma sabiduria ta serca e humildenan.
Den e buki di Romanonan capitulo 1 :26 +27+28 nos tur por lesa con Dios ta deshonra hende cu kier cambia e berdad di Dios pa un mentira.
Y nos tur por lesa e cambio cu a tuma lugar den bida di hende, pasobra nan no kier reconoce Dios.
Tur esaki pa motibo di orguyo pasobra: Orguyo ta bin prome cu destruccion y un spirito arogante prome cu caida.( Proverbionan 16:18).
E malbado cu su cara yen di orguyo, no ta busca Dios. Tur su pensamentonan ta : No tin Dios ( Salmo 10:4).
Ta hopi hende ta wanta na orguyo den hopi forma, aunke nan sa cu orguyo ta destructivo, toch nan ta sigi persisti y busca apoyo tur caminda.
Farao tabata orguyoso Dios a caba cune,
Jonas tabata oguyoso y Dios mester a pone bao di disiplina
Saulo di Tarso tabata orguyoso, y Dios mester a trata cune.
Hende orguyoso no kier tende di Dios pasobra e enemigo ta haci nan ciego y sordo, pa nan permanece den scuridad, y no reconoce e Amor cu Dios tin pa nan.
Tin algun a haña chens pa arepenti, pero a continua den nan orguyo y esey a causa nan destruccion.
Hende orguyoso ta tuma bo na malo ora bo descubri y reprende nan inmoralidad, cu nan ta biba den dje.(Corda riba Juan Bautista y Herodes).( Marco 6:17-19).
E recompensa di Humildad, y e temor di Señor , ta rikesa honor y bida.(Proverbionan 22:4)
