Atrobe mi ta bisa boso, cu si riba tera dos di boso bay di acuerdo tocante cualkier cos,cu nan pidi,esaki ta wordo haci pa nan door di mi Tata cu ta den cielo.( Mateo 18:19).
Yuinan ta regalo di Dios, e mayornan ta wordo bendiciona door di Dios, cu yiu pa asina nan cria, educa, guia, warda, y haci tur locual ta na nan alcanse pa e yiu bira un persona cu ta sirbi Dios.
Esey ta nifica cu ta deber di tur mayor pa guia nan yiu riba e caminda di Señor.
Tur mayor cu ta haci oracion hunto, lo conoce beneficionan di Dios pa nan yiunan, pasobra den bida no ta tur cos ta placa, pero un cos si nos sa cu ora nos hinca Dios den e asunto, Dios ta bira doño di e asunto.Mescos tambe tur mama soltero y tata soltero mester haci igual pasobra Dios ta scucha.
Yuinan semper lo beneficia di e oracion y e bida dedica di nan mayornan na Dios, pasobra Dios ta scucha oracion di tur mayor cu aserca Dios den nomber di Cristo Hesus pasobra Dios ta mira esaki como un cumplimento di nan deber , mescos cu un tata tin e deber di pone cuminda riba mesa pa su yiunan. ( 1 Timoteo 5:8).
Mescos cu e homber y e muher a uni den nan relacion sexual pa asina yega na un yiu, mescos tambe Dios ta exigi di tur mayor pa nan tin un bida di oracion uni, pasobra ora nan uni constantemente den oracion cielo ta habri riba nan hogar.
Cos mester cambia den un hogar ora esnan cu ta dirigi e hogar ta somete na Cristo Hesus kende ta e cabes di tur hogar.
E mayornan ta responsabel pa e bienestar spiritual y social di nan hogar, pasobra nan deber ta pa aserca Dios hunto tur momento pesey e palabra d Dios ta bisa cu nan dos lo ta un solo carni.
Si nan dos uni den maldad, nan lo carga e consecuencia di nan maldad, si nan dos dicidi di uni den inmoralidad y bagamunderia tambe nan lo carga e consecuencia, pero si nan dos dicidi di busca cara di Dios den tur cos, tur hende lo mira con e man di Dios lo move riba nan hogar.
No tin ningun bruheria of santeria of cualkier otro tipo di maldad cu por resisti e poder di oracion di mayor, hopi biaha cas ta tambalia, yuinan ta rebelde, situacion financiero ta debil, pasobra mayornan ta falta oracion den nan hogar.
Un famia sin oracion ta manera un cas sin dak, un auto sin motor, un curpa sin rosea, esey ta nifica cu nos bida sin oracion ta un bida bashi y un bida morto spiritualmente, y pasobra e bida ta morto spiritual, su avance fisico ta wordo tranca door di e enemigo.
Ta dificil pa adulterio presenta mey , mey di un matrimonio cu ta haci oracion, pasobra Dios mes lo aleha tur tentacion y inmoralidad for di e hogar, Dios lo traha un trankera rond di e hogar, pa motibo di e oracion cu ta tuma lugar constantemente den e hogar.
Den e buki di Daniel capitulo 6 , Daniel ta wordo tira den cueba di leon, pero e leonnan no por haci Daniel nada, pasobra Dios a manda un angel pa sera boca di e leonnan, asina tambe lo sosode ora den un cas papai y mamai ta haci oracion.
Awor en adelante tur hende mester compronde e necesidad di oracion den un hogar, pasobra pa medio di oracion cielo lo ta habri.( Isaias 45:8).(1Reynan 18:41-45).
