1 Juan Capitulo 5 vers 14 +15 ta bisa nos: Y esaki ta e confiansa cu nos tin Su dilanti, cu si nos pidi cualkier cos conforme Su boluntad, E ta tende nos. Y si nos sa cu e ta tende nos den tur loke nos pidi , nos sa cu nos tin e peticionnan cu nos pidi di djE.
Ta tempo pa nos como Mayor aumenta nos oracion dilanti di Dios pa nos yuinan,
Pa stroba plan di diabel, kibra cadena di droga, desvia accidente, evita violencia, sera porta pa tur abuso sexual,y mas cu tur cos pa nan conoce Dios y permanece den caminda di Dios.
Ta tempo pa sali for di tur tipo di “Happy Hour y haci Oracion pa bo yuinan, pasobra oracion di mayor tin poder, locual bo ta pensa cu bo mester di placa, pa manda e mucha afo, of pa e bay tuma terapia, etc, nos kier bisa bo cu si humildemente bo dobla bo rudia na Dios, lo bo mira resultado cu Dios Todopoderoso lo duna bo.
Señor kier pa mayornan sali for di cosnan cu nan ta envolvi den dje, cual ta trece spirito impuro den cas.
Por ehemplo Rabia y Desconfiansa cu tin entre mayor, infieldad, falta di pordon, dobbel bida ,bruheria , organisacion diabolico,( caminda nomber di Cristo Hesus y e Sanger di Cristo Hesus no ta wordo menciona).
Ta boluntad di Dios pa mayornan bandona tur e tipo di cosnan ey pasobra hopi biaha nan ta e causa spiritual y mental di e yiu su problema.
Oracion di mayor tin poder , den 1 Cronicanan 29 vers 19 David ta haci oracion pidiendo Dios lo siguiente: Y duna mi yiu homber Salomon un curazon perfecto pa warda bo mandamentonan, bo testimonionan, y bo statutonan y pa cumpli cu nan tur.
Den 1 samuel capitulo 1 vers 27 Ana ta bisa; Pa e mucha aki mi a haci oracion y Señor a duna mi peticion cu mi a haci serca djE. Señor ta contesta oracion di un mayor.
Mayornan corda kico e palabra di Dios ta bisa den 2 Timoteo 1 vers 7: Pasobra Dios no a duna nos un spirito di temor, sino di poder y di amor, y di sano huicio,
Marco Capitulo 11 vers 25 ta bisa: Ki ora cu boso ta para haci oracion, pordona si boso tin algo contra un hende, pa boso Tata cu ta den cielo tambe pordona boso, boso picanan..
Un hoben no tin mester den hañe den problema cu autoridad(Polis) si e tin respet.( Romanonan 13 :1-5)
Colosensenan capitulo 3 vers 23+24+25 ta pone tur mayor na altura kico nan tin di bisa nan yiunan: Tur loke boso haci, haci boso trabao di curazon, como pa Señor y no pa hende, sabiendo cu for di Señor boso lo ricibi e recompensa di e herencia .Ta Señor ta esun cu boso ta ricibi. Pasobra esun cu haci malo,lo ricibi e consequencianan di e maldad cu e a haci, y esey sin distincion di persona.
Mayornan splica e hobennan pa nan compronde cu ora bo cay den un of otro crimen,manera ladronicia, atraco, droga, asesinato, etc un bon abogado por yuda baha bo castigo , pero e no por kita e consequencia y e marca di bo maldad.
Ta solamente Hesus Cristo por kita esey y duna bo un bida nobo,( 2 Corintionan 5 vers 17) pesey nos ta haci un yamamda riba tur mayor , pa cubri nan yiunan den oracion.