Tin un secreto inmenso den hacimento di bon, tin un balor cu bo no por wordo calcula, ora bo man ta sali pa yuda otro hende, sin wak atras, sin haci ningun propaganda, di bo propio bondad, pasobra riba mundo no tin ningun hende cu ta bon , solamente Dios cu ta den cielo (Marco 10:18).
Nos ta bibando den un mundo malo, severo, perverso, inmoralidad ta domina y cada dia nos ta nota cu e palabra di Dios ta cumpli, nos ta bibando den tempo trabahoso caminda hende a perde interes den su prohimo, solamente nan tin bista riba nan mes, esey ta para scirbi den 2 Timoteo 3:1-5.
Ta solamente e misericordia y compasion di Dios por habri wowo di hende pa nan sigi haci bon.
Haci bon ta kita stress y depresion.
Haci bon na bida di otro, ta trece alegra den bo propio bida.
Haci bon ta pone bo sinti bon.
Ora nos haci bon nos trabao bira facil.
Haci bon ta promove bon.
Haci bon ta motiva bo pa sigi haci bon.
Ora nos haci bon nos ta demostra cu nos ta yiu di Dios, Pasobra nos Dios ta un bon Dios.
E bondad di mas grandi cu ta existi Dios a hacie pa nos den Juan 3:16, pasobra Dios a stima e mundo aki asina tanto, cu E a duna su yiu unigenito, pa ken cu kere den dj’E no bay perdi ma tin bida eterno.
Laga nos no lubida cu Dios a stima nos prome y a haci bon pa nos , pesey ta nos deber pa haci bon pa otro.
Oh purba y mira cu Señor ta bon, bendiciona ta e hende cu ta tuma refugio den dj’E.(salmo 34:8)
Pasobra Abo Señor ta bon, y cla pa pordona, y abundante den misericordia, pa tur esnan cu ta sclama na bo ( Salmo 86:5).
Duna gradicimento na Señor, pasobra e ta bon, pasobra Su misericordia ta pa semper.( Salmo107:1).
Alaba Señor pasobra e ta bon,canta alabansa na Su nomber, pasobra esaki ta agradabel (Salmo 135:3).
No sea gaña, mi rumannan stima. Tur bon regalo, y tur don perfecto ta bin for di ariba, y ta baha bin for di e Tata di lusnan, serca kende no tin variacion ni sombra di cambio.(Santiago 1:16+17).
Siguramente bondad y misericordia lo siguimi, tur e dianan di mi bida, y lo mi biba den e cas di Señor pa semper ( Salmo 23:6).
Siñami, mi haci Bo boluntad,pasobra Abo ta mi Dios, laga Bo bon Spirito guiami na e tera di rectitud.(Salmo 143:10).
Ora nos ta papia di haci bon ta nifica cu nos ta cuminsa na pordona otro, nos ta pordona otro manera Dios a pordona nos, no laga ningun palabra dañino sali for di nos boca solamente palabra pa edifica otro,
Laga nos pone tur rabia y amargura un banda, pasobra esey ta haci daño na nos mes,y corda riba e bondad di Dios pa nos bida.
Bendiciona ta esun cu su yudansa ta e Dios di Jacob, kende su speransa ta den Señor su Dios.
Oh duna gradicimento na Señor, pasobra E ta bon, pasobra Su misericordia ta pa semper ( 1 Cronicanan 16:34).
E bondad di Dios, mester wordo reconoci rond mundo, pasobra no tin nada pa reemplasa e bondad di Dios, Dios ta sostene tur esnan cu ta kere den dj’E, Dios su man no ta cansa di haci bon pasobra e ta Dios di awe, ayera y pa semper.
Cada dia nos mester tuma tempo pa gradici Dios pa su bondad, y dune danki pa henter nos famia.
