Ta deseo y boluntad di Dios, pa tur famia por haci oracion den un acuerdo pasobra esey ta locual e palabra di Dios ta bisa nos pa haci.
Ta para scirbi den Mateo 18:19-20: Atrobe Mi ta bisa boso cu si riba tera dos di boso bay di acuerdo tocante cualquier cos, cu nan pidi, esaki lo wordo haci pa nan door di Mi Tata cu ta den cielo.
Pasobra caminda dos of tres ta reuni den mi nomber, ey mi ta meymey di nan.
Tur acuerdo dilanti di Dios mester wordo haci door di dos hende bibo, bo no por sera acuerdo cu hende morto, ta tempo perdi e no ta bay funciona, esey kiermen cu di tur forma esun cu bo ta sera acuerdo cune mester ta den boluntad di Dios. Dios nos ta atende cu ningun acuerdo cu ta for di su boluntad.
Ora un homber y un muher uni den matrimonio, dilanti di Dios nan ta un solo carni.
Pasobra Dios ta respeta e acuerdo.
Dios ta apoya e acuerdo.
Pasobra e acuerdo ta den boluntad di Dios.
Pasobra e acuerdo ta un mandato di Dios.(Genesis 2:23-25).
Den matrimonio e homber y muher y nan yuinan mester haci oracion hunto pasobra esey ta boluntad di Dios. Mescos cu den criansa di nan yuinan mester tin un acuerdo, cual ta lanta e yuinan den disiplina y instruccion di Señor.Ora henter famia uni di oracion,y busca cara di Dios cosnan grandi lo sosode.
Haci mi goso completo door di keda di acuerdo cu otro, manteniendo e mesun amor,uni den Spirito, teniendo un solo proposito. No haci nada cu un actitud di egoismo of orguyo, ma cu humildad laga cada un di boso considera e otro mas importante cu e mes.( Filipensenan 2:2-3)
Esey ta e boluntad di Dios un acuerdo pero, nos ta mira cuanto acuerdo falso tin rond mundo, di hendenan cu ta busca nan propio fama, grandesa y poder, y cu ta laga Dios for di tur cos y nan kier haña bon resultado di nan hechonan, y nan no kier compronde cu ora algo no ta den boluntad di Dios e no tin apoyo di Dios.
Si nos uni den un acuerdo pa haci bon, Dios ta cu nos.
Pedro y Juan tabata di un acuerdo, ora nan a topa cu e paralitico na porta di Betesda y nos tur sa cu un milager a tuma lugar.
Pablo y Silas tabata di un acuerdo ora nan dos tabata sera den prison ta haci oracion y canta Alabansa y milager a sosode.
Sadrac, Mesac y Abednego tabata di un acuerdo, ora cu nan a bisa Rey Nabucodonosor cu nan no ta baha cabes pa e imagen, nan a wordo tira den forno di candela, pero Dios a libra nan,
Ananias y Safira a bay di acuerdo y a laga satanas gaña nan pa asina nan purba gaña e Spirito Santo di Dios, y nan a muri.( Hechonan 5:1-11).
Finalmente , boso tur sea di un acuerdo cu otro, teniendo compasion cu otro,stimando manera ruman,y sea misericordioso y humilde den spirito,no pagando malo cu malo of insulto cu insulto, ma mas bien dunando un bendicion, pasobra boso a wordo yama pa e proposito aki, pa boso por hereda un bendicion.( 1Pedro 3:8).
Por ultimo rumannan, regosiha,sea perfecto,consola boso, sea di un acuerdo cu otro,biba na pas, y e Dios di amor y di pas lo ta cu boso.( 2 Corintionan 13:11).
Pa di un acuerdo boso, den un solo bos,por glorifica e Dios y Tata di nos Señor Hesus Cristo.( Romanonan 15:6).